مەملەكەتتىك باسقارۋ نەگە ءتيىمسىز بولىپ بارا جاتىر؟

ەكونوميستتىڭ پىكىرىنشە, بۇگىندە سالالىق مينيسترلىكتەر ستاندارت پەن ساياساتتى قالىپتاستىرۋدىڭ ورنىنا كوبى تاريف ەسەپتەۋمەن, بيۋدجەت بولۋمەن, ساتىپ الۋمەن اينالىسىپ كەتكەن. مۇنداي رەتسىزدىك ءوز كەزەگىندە باسقارۋ ىسىندە شاتاسۋعا جانە سىبايلاس جەمقورلىق تاۋەكەلدەرىنە اكەلۋى ىقتيمال.

«مينيسترلىكتەر ءوز سالاسىنىڭ مازمۇندىق بولىگىنە – مەديتسيناعا, بىلىمگە, عىلىمعا نازار اۋدارۋى ءتيىس. ال قارجىلىق جانە ەكونوميكالىق تالداۋدى قارجى مينيسترلىگى مەن ۇلتتىق ەكونوميكا مينيسترلىگى جۇرگىزۋى كەرەك. قازىرگى دەنساۋلىق ساقتاۋ جۇيەسىندە ءبىر ورگانعا تىم كوپ مىندەت جۇكتەلگەن. دەنساۋلىق ساقتاۋ مينيسترلىگى ءبىر مەزەتتە ەمدەۋ ستاندارتتارىن ازىرلەيدى, ءدارى-دارمەك ساتىپ الادى, بيۋدجەت جوسپارلايدى جانە باعانى باقىلايدى. ناتيجەسىندە مەديتسينالىق شەشىمدەر مەن ەكونوميكالىق شەشىمدەر ارالاسىپ كەتەدى», دەدى رۋسلان سۇلتانوۆ economyKZ.org سايتىندا جاريالانعان پىكىرىندە. 

سونداي-اق ساراپشى جەكە مەكتەپتەر مەن ۋنيۆەرسيتەتتەر دە قوس باقىلاۋعا ءتۇسىپ وتىرعانىن جەتكىزدى.ء بىلىم مينيسترلىگى ءارى رەتتەۋشى, ءارى قارجى ءبولۋشى رولىندە بولعاندىقتان, جەكە سەكتوردىڭ دامۋى تەجەلۋى ىقتيمال. سوندىقتان رۋسلان سۇلتانوۆ ماسەلەنى شەشۋ ءۇشىن ناقتى 5 ۇسىنىسىن ورتاعا سالدى. 

«1. مينيسترلىكتەر فۋنكتسيالارىن قايتا قاراۋ. نەگىزگى جانە قوسالقى مىندەتتەردى ناقتى ءبولۋ.

2. تاۋەلسىز اگەنتتىكتەر قۇرۋ. مىسالى, مەديتسينا مەن ءبىلىم سالاسىنداعى ەكونوميكالىق تيىمدىلىكتى باعالايتىن قۇرىلىمدار.

3. ۆەدومستۆوارالىق كەلىسىم جۇيەسىن ەنگىزۋ. قارجىلىق سالدارى بار شەشىمدەر مىندەتتى تۇردە سىرتقى باعالاۋدان ءوتۋى ءتيىس.

4. قوعامدىق ەسەپتىلىك ورناتۋ. مينيسترلىكتەر شىعىن ەمەس, ناتيجە بويىنشا ەسەپ بەرۋى قاجەت.

5. جەكە سەكتوردى قولداۋ. جەكە مەكتەپتەر مەن كلينيكالار ءۇشىن تەڭ مۇمكىندىك جاساۋ.

ءار مينيسترلىك ءوز باعىتىمەن اينالىسۋى كەرەك. سالالىق ورگاندار – مازمۇن مەن ساپاعا, ەكونوميكالىق ورگاندار – قارجى مەن تيىمدىلىككە جاۋاپتى بولۋى ءتيىس», دەدى رۋسلان سۇلتانوۆ. 

ەكونوميست مينيسترلىكتەردىڭ قۇزىرەتىن بولۋ مەملەكەتتىك باسقارۋدى كۇردەلەندىرمەيدى, كەرىسىنشە, تۇراقتى ءارى اشىق ەتەتىنىن العا تارتىپ وتىر.