قاڭتار ايىندا وتەتىن ۇبت-عا قاتىسۋ ءۇشىن ءوتىنىش قابىلداۋ 22 جەلتوقسان باستالىپ, 30 جەلتوقسانعا دەيىن جالعاسادى. ۇبت-عا تىركەلۋ ۇلتتىق تەستىلەۋ ورتالىعىنىڭ app.testcenter.kz سايتىندا نەمەسە UTO قوسىمشاسى ارقىلى جۇرگىزىلەدى, دەپ جازادى Egemen.kz.
ال تەستىلەۋدىڭ ءوزى 10 قاڭتار مەن 10 اقپان ارالىعىندا وتەدى.
عىلىم جانە جوعارى ءبىلىم مينيسترلىگىنىڭ مالىمەتىنشە, قاڭتارداعى ۇبت-عا شارتتى تۇردە اقىلى نەگىزدە كۇندىزگى وقۋ نىسانى بويىنشا جوعارى وقۋ ورىندارىنا قابىلدانعان, جازعى ۇبت ناتيجەلەرى بويىنشا شەكتى بالل جيناماعاندار, شىعارماشىلىق ءبىلىم بەرۋ باعدارلامالارىنىڭ توپتارىنان اقىلى نەگىزدە باسقا دايىندىق باعىتتارىنا, پەداگوگيكالىق باعىتقا اقىلى نەگىزدە اۋىسقىسى كەلەتىندەر, وتكەن جىلعى مەكتەپ جانە كوللەدج تۇلەكتەرى, قازاقستان ازاماتتىعى جوق بىراق ۇلتى قازاق تۇلعالار, شەتەلدە ءبىلىم العان قازاقستان ازاماتتارى, سونداي-اق مەكتەپ بىتىرەتىن تۇلەكتەر جوعارى وقۋ ورىندارىنا اقىلى نەگىزدە ءتۇسۋ ءۇشىن قاتىسادى.
ءوتىنىش بەرۋ بارىسىندا قاتىسۋشىلار تەستىلەۋ وتكىزىلەتىن ورىندى, كۇندى جانە ۋاقىتتى وزدەرى تاڭدايدى.
2026 جىلى ۇلتتىق بىرىڭعاي تەستىلەۋدىڭ فورماتى وزگەرمەيدى. ۇبت قۇرىلىمى بۇرىنعى قالپىندا قالادى: تالاپكەرلەر ءۇش مىندەتتى ءپاندى جانە تاڭداۋى بويىنشا ەكى بەيىندىك ءپاندى تاپسىرادى. ۇبت تاپسىرمالارىنىڭ جالپى سانى – 120. ونىڭ ىشىندە «قازاقستان تاريحى» ءپانى بويىنشا – 20 تاپسىرما, «وقۋ ساۋاتتىلىعى» مەن «ماتەماتيكالىق ساۋاتتىلىق» پاندەرىنەن – 10 تاپسىرمادان, سونداي-اق ەكى بەيىندىك ءپاننىڭ ارقايسىسىنان – 40 تاپسىرمادان بەرىلەدى. ۇبت بويىنشا ەڭ جوعارى بالل دا وزگەرمەيدى.
ايتا كەتەيىك, ۇبت ترانسفورماتسياسى 2027 جىلى باستالادى. بۇل تۋرالى ءماجىلىس كۋلۋارىندا عىلىم جانە جوعارى ءبىلىم ۆيتسە-ءمينيسترى گۇلزات كوبەنوۆا ايتقان بولاتىن.