جاپونيا تاراپىنان قازاقستانمەن تسيفرلاندىرۋ, جاساندى ينتەللەكت, تسيفرلىق ينفراقۇرىلىمدى دامىتۋ جانە يننوۆاتسيالىق تەحنولوگيالاردى ەنگىزۋ سالالارىندا ىنتىماقتاستىققا قىزىعۋشىلىق بايقالىپ وتىر, دەپ حابارلايدى Egemen.kz.
بيىل قاراشا ايىندا قازاقستان تاراپىمەن وتكەن ديپلوماتيالىق كەزدەسۋ بارىسىندا جاپونيانىڭ تسيفرلاندىرۋ ءمينيسترى ح.ماتسۋموتو قازاقستانداعى تسيفرلىق ترانسفورماتسيانىڭ قارقىنىن جوعارى باعالاپ, ەلدىڭ زاماناۋي تسيفرلىق ەكوجۇيە قالىپتاستىرۋ باعىتىندا جاساپ جاتقان قادامدارى جاھاندىق ۇردىستەرگە ساي كەلەتىنىن جانە جاپونيامەن ءوزارا ءتيىمدى ىنتىماقتاستىق ءۇشىن كەڭ مۇمكىندىكتەر اشاتىنىن اتاپ ءوتتى.
بىرىڭعاي ەكوجۇيە قالىپتاستىرۋ ماقساتىندا سۋپەركومپيۋتەرلىك كلاستەر ىسكە قوسىلىپ, Alem.ai حالىقارالىق جاساندى ينتەللەكت ورتالىعى اشىلدى. قازاقستان بۇل سالادا جاپونيامەن ىنتىماقتاستىققا, ونىڭ ىشىندە ورتالىق ازيادا قاۋىپسىز ءارى سەنىمدى جاساندى ينتەللەكت ەكوجۇيەسىن بىرلەسىپ قۇرۋعا مۇددەلى.
سونداي-اق وتكەن جىلى جاپونيانىڭ عىلىم جانە تەحنولوگيالار اگەنتتىگى (JST) قورشاعان ورتانى قورعاۋ, ەنەرگەتيكا جانە اپاتتاردىڭ سالدارىن بولدىرماۋ سياقتى باسىم باعىتتاردى قامتيتىن حالىقارالىق باعدارلامانى ىسكە قوسقانىن اتاپ وتكەن ءجون. كونكۋرستىق ىرىكتەۋ ناتيجەسىندە 64 ءوتىنىمنىڭ ىشىنەن 10 عىلىمي جوبا تاڭداپ الىنعان.
ىرىكتەۋدەن وتكەن جوبالاردىڭ ءبىرى – ەكولوگيالىق تۇرعىدان قاۋىپسىز ءارى تەحنولوگيالىق جاعىنان زاماناۋي تاۋ-كەن ءوندىرىسىن دامىتۋعا باعىتتالعان قازاق-جاپون عىلىمي جوباسى «Next-generation Smart Mining Plus for Sustainable Resources Development».
جوبا 2030 جىلعى 31 ناۋرىزعا دەيىن ەسەپتەلگەن, ونىڭ قارجىلاندىرۋ كولەمى 3,2 ملن اقش دوللارىن قۇرايدى. جوبا شەڭبەرىندە «اقىلدى» تەحنولوگيالاردى, ەكولوگيالىق مونيتورينگ جۇيەلەرىن جانە تسيفرلىق شەشىمدەردى ەنگىزۋ, سونداي-اق نازارباەۆ ۋنيۆەرسيتەتى بازاسىندا جابدىقتاۋ مەن كادرلاردى دايارلاۋدى قوسا العاندا, عىلىمي-ءبىلىم بەرۋ الەۋەتىن دامىتۋ كوزدەلگەن.