كەلەس اۋدانى اۋماعىنداعى ۇزاق جىلداردان بەرى پايدالانىلىپ كەلە جاتقان كەلەس وزەنىنەن وتەتىن كوپىر بىرنەشە كۇن بويى جاۋعان نوسەر جاڭبىردىڭ سالدارىنان تىرەك باعاندارىنىڭ ءتۇبى شايىلىپ, قۇلاعان بولاتىن. ەسكى كوپىردىڭ ورنىنا جاڭاسىن سالۋ جوسپارلانىپ وتىر, دەپ حابارلايدى Egemen.kz.
كوپىر 1970 جىلدارى سالىنعان. ۇزىندىعى – 54 مەتر, ەنى – 11 مەتر, بيىكتىگى – 6,5 مەتر. اتالعان كوپىر ارقىلى ۇشقىن اۋىلدىق وكرۋگىنە قاراستى دوستىق, قورالاس جانە ۇشقىن ەلدى مەكەندەرىنىڭ تۇرعىندارى اباي اۋىلىمەن كولىك قاتىناسىن جۇزەگە اسىرعان. ورتاشا جوندەۋ جۇمىستارى 2010 جىلى جۇرگىزىلگەن, ال 2024 جىلى «وڭتۇستىك جولدارى» مكك تاراپىنان جاعالاۋدى بەتونمەن بەكىتۋ جانە وزەن تۇبىنە ءىرى تاس توسەۋ جۇمىستارى اتقارىلىپتى.
وبلىس اكىمىنىڭ ءبىرىنشى ورىنباسارى زۇلپىحار جولداسوۆ جاۋاپتى سالا باسشىلارىمەن بىرگە كوپىردىڭ قۇلاۋىنا بايلانىستى وقيعا ورنىنا بارىپ, كوشپەلى كەڭەس وتكىزدى. كەزدەسۋ بارىسىندا جاڭا كوپىر سالۋ ماسەلەلەرى تالقىلانىپ, ءتيىستى ۇيىمداستىرۋ جۇمىستارى باستالدى. قازىرگى ۋاقىتتا جوبالاۋ ۇيىمىمەن جوبالىق-سمەتالىق قۇجاتتامانى ازىرلەۋ بويىنشا كەلىسسوزدەر جۇرگىزىلىپ جاتىر.
اۆتوكولىك قوزعالىسى ۋاقىتشا اينالما جولدار ارقىلى ۇيىمداستىرىلعان. سونىمەن قاتار, كوپىر ارقىلى وتكەن «داربازا» تسج-نىڭ سۋ قۇبىرى زاقىمدانۋىنا بايلانىستى ۇشقىن ەلدى مەكەنىندەگى 136 ۇيگە تاۋلىگىنە ەكى رەت ارنايى اۆتوتسيستەرنالار ارقىلى سۋ جەتكىزىلىپ جاتىر. قالىپتاسقان جاعدايعا بايلانىستى ۇشقىن ەلدى مەكەنىندەگى 40 وقۋشى اعىمداعى توقسان اياقتالعانعا دەيىن قاشىقتان وقىتۋ فورماتىنا اۋىستىرىلعان.