بوكس الەمىنىڭ بەدەلدى باسىلىمى Ring Magazine ورتا سالماقتاعى ۇزدىك بوكسشىلار رەيتينگىن جاڭارتىپ, وتانداسىمىز جانىبەك ءالىمحان ۇلىنىڭ ەسىمىن تىزىمنەن الىپ تاستادى. بۇعان دەيىنگى رەيتينگتىڭ كوشىن باستاپ كەلگەن WBO جانە IBF بەلبەۋلەرىنىڭ يەگەرىنە قاتىستى مۇنداي شەشىمنىڭ قابىلدانۋىنا ونىڭ دوپينگ سىناماسىنان تىيىم سالىنعان زاتتاردىڭ تابىلۋى سەبەپ بولعان, دەپ حابارلايدى Egemen.kz.
ايتا كەتەيىك, جەلتوقسان ايىنىڭ باسىندا ورتا سالماقتاعى قوس تۇجىرىم بويىنشا الەم چەمپيونى جانىبەك ءالىمحان ۇلىنىڭ دوپينگ-سىناماسىنان تىيىم سالىنعان «مەلدوني» پرەپاراتى تابىلعانى بەلگىلى بولعان ەدى.
بۇل جاعداي بوكسشىنىڭ مانسابىنداعى ماڭىزدى قادامداردىڭ ءبىرى – كۋبالىق ەريسلاندي لارامەن WBA تيتۋلى ءۇشىن ءوتۋى ءتيىس ءۇشىنشى بەلبەۋ ءۇشىن جەكپە-جەگىنىڭ توقتاتىلۋىنا اكەپ سوقتى.
دەگەنمەن, ءالىمحان ۇلى مەن ونىڭ كومانداسى بۇل ايىپتاۋلارمەن كەلىسپەيدى. ولار ساراپتاما قورىتىندىسىن جوققا شىعارىپ, بوكسشىنىڭ تاماقتانۋ راتسيونى مەن دارۋمەندەر كەشەنىنە ەشقانداي وزگەرىستەر ەنگىزىلمەگەنىن مالىمدەگەن ەدى. قازىرگى تاڭدا سپورتشىنىڭ تاراپى ءوز كىناسىزدىگىن دالەلدەۋ ماقساتىندا VADA ۇيىمىنان «ۆ» سىناماسىن اشۋدى رەسمي تۇردە تالاپ ەتتى.
تۋريزم جانە سپورت ۆيتسە-ءمينيسترى سەرىك جاراسباەۆ بوكسشى جانىبەك ءالىمحان ۇلىنىڭ تالداۋىنان دوپينگتىڭ انىقتالۋىنا قاتىستى پىكىر ءبىلدىرىپ, سپورتشىنىڭ كومانداسىنا مينيسترلىك تاراپىنان قولداۋ كورسەتىلەتىنىن ايتقان ەدى.
سونىمەن قاتار راحىمجان ەردەنبەكوۆ بۇل نورما كاسىبي بوكسقا دەگەن سەنىمنىڭ نەگىزى ءارى سپورت الەمىنىڭ بارلىق وكىلدەرى ءۇشىن مىندەتتى دۇنيە ەكەنىن ايتتى.
ال بەلىگىلى باپكەر جۇمابەك ومىرزاقوۆ جانىبەك ءالىمحان ۇلىنىڭ ەندى ءىرى جەكپە-جەكتەر وتكىزبەۋى ىقتيمال ەكەنىن اتاپ ءوتتى.