استانا. 23 اقپان. «بارىس» ءوز ايدىنىندا نوۆوسيبيرسكىنىڭ «سيبير» كومانداسىنان 1:0 ەسەبىمەن باسىم ءتۇستى. بۇل تۋرالى egemen.kz حابارلادى.
ايدىنداعى ايقاس بىردەن حوككەيشىلەردىڭ تەكە-تىرەسىمەن باستالدى. نەبارى 2-مينۋتتا «بارىستىڭ» «جولبارىسى» اتانىپ جۇرگەن دامير رىسپاەۆ «سيبير» سەنىم ارتقان مىقتى ۆيتالي مەنشيكوۆتى ساباسىنا ءتۇسىردى. قوس حوككەيشى وسىمەن سوڭعى ءبىر ايدا ەكىنشى رەت جۇدىرىقتاستى. ەكەۋىندە دە ءداميردىڭ باسىم تۇسكەنىن ايتا كەتەيىك.
ويىن بارىسىنا كەلەر بولساق, قارسىلاستار العاشقى ەكى كەزەڭدە ءبىر-ءبىرىنىڭ وسال تۇسىن تابا المادى. تەك كەزدەسۋدىڭ اياقتالۋىنا 4 مينۋت قالعان كەزدە «بارىستىڭ» قورعاۋشىسى كەۆين داللمەن «سيبير» قاقپاسىنان ساڭىلاۋ تاپتى. ناتيجەلى شابۋىلدى ۇيىمداستىرعان كوماندا كاپيتانى برەندون بوچەنسكي مەن نايدجەل دوۋس بولاتىن. قالعان ۋاقىتتا ەسەپ وزگەرمەي, ايدىن يەلەرى قاتارىنان ءتورتىنشى جەڭىسكە قول جەتكىزدى.
داللمەن 380 ويىندا 300 ۇپاي (113 گول+187 ناتيجەلى پاس) جيناپ, ليگا تاريحىندا وسىنشا ناتيجە كورسەتكەن العاشقى قورعاۋشى اتاندى. وسىلايشا ول قۇرلىقتىق حوككەي ليگاسىنىڭ رەكوردىن ورناتتى.
بۇگىندە «بارىس» 90 ۇپايمەن قحل-دىڭ شىعىس كونفەرەنتسياسىندا 5-ورىندا كەلەدى. استانالىقتاردىڭ ليگانىڭ تۇراقتى چەمپيوناتى اياسىندا ەندى ءبىر ويىنى قالدى. 24 اقپان كۇنى ءوز ايدىنىندا نيجني نوۆگورودتىڭ «تورپەدوسىن» قابىلدايتىن اندرەي نازاروۆتىڭ شاكىرتتەرى پلەي-وفف كەزەڭىنە جولداما العانى بەلگىلى. بۇل كەزەڭنىڭ العاشقى ساتىسىندا «بارىس» ومبىلىق «اۆانگاردپەن» كۇش سىناسادى. ءوز كەزەگىندە, رەسەيلىك كوماندا 107 ۇپايمەن شىعىس كونفەرەنتسياسىندا 4-ورىنعا تابان تىرەپ تۇر. ال وسى كونفەرەنتسيادا توپ جارۋدان باستى ءۇمىتتى بولعان «سيبير» استاناداعى جەڭىلىستەن كەيىن جاعدايىن ناشارلاتىپ الدى. ەندى ولارعا «شىعىستىڭ» مىقتىسى اتانۋ ءۇشىن سوڭعى ويىندا جەڭىپ قانا قويماي, باستى قارسىلاسى قازاندىق «اق بارستىڭ» جەڭىلۋىن تىلەۋدەن باسقا امال جوق.
ەلامان قوڭىر.
دەرەك: egemen.kz.
سۋرەت: hcbarys.kz.