سەنات دەپۋتاتتارى ارحيۆ ءىسى جانە قۇقىققا قايشى كونتەنتتىڭ تارالۋىن شەكتەۋ ماسەلەلەرى بويىنشا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ارحيۆ ءىسى جانە قۇقىققا قايشى كونتەنتتىڭ تارالۋىن شەكتەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ءبىرىنشى وقىلىمدا قابىلدادى, دەپ حابارلايدى Egemen.kz.
ايتا كەتەيىك, زاڭدى بۇعان دەيىن ءماجىلىس قابىلداعان.
سەناتور امانگەلدى ەسبايدىڭ ايتۋىنشا, بۇل قۇجات تسيفرلىق ءارحيۆتى قالىپتاستىرۋدىڭ قۇقىقتىق نەگىزدەرىن ايقىنداپ, ۇلتتىق ارحيۆ قورىنىڭ قۇرامىن جانە ۇعىمدىق اپپاراتىن زامان تالابىنا, ونىڭ ىشىندە تسيفرلاندىرۋ ۇدەرىستەرىنە سايكەس كەڭەيتەدى. سونداي-اق اۋىلدىق ەلدى مەكەندەردە ەڭبەك ەتەتىن ارحيۆ قىزمەتكەرلەرىنە قوسىمشا اقى تولەۋ ءتارتىبىنىڭ زاڭدىلىعىن بەكىتەدى. بۇعان قوسا ارحيۆتەرگە «ۇلتتىق» مارتەبە بەرۋ قۇقىعى ايقىندالدى.
سونىمەن قاتار دەپۋتات زاڭ بىرىڭعاي ەلەكتروندىق ءارحيۆتى قالىپتاستىرۋعا, قۇجاتتاردى ەلەكتروندىق فورماتقا كوشىرۋگە جانە سالالىق ۇعىمداردى كەڭەيتۋگە مۇمكىندىك بەرەدى دەپ وتىر.
زاڭداعى نەگىزگى جاڭاشىلدىقتاردىڭ ءبىرى – مەملەكەتتىك ارحيۆتەرگە «ۇلتتىق» مارتەبەنىڭ بەرىلۋى. بۇل قادام تاريحي ءارى مادەني قۇندىلىقتاردى ساقتاۋ تەتىكتەرىن جەتىلدىرۋگە, ارحيۆ مەكەمەلەرىنىڭ ماتەريالدىق-تەحنيكالىق الەۋەتىن كۇشەيتۋگە, سونداي-اق ولاردىڭ قوعامداعى ءرولى مەن سالماعىن ارتتىرۋعا مۇمكىندىك بەرەدى.
ونىڭ ايتۋىنشا, ءداستۇرلى ەمەس جىنىستىق باعداردى ناسيحاتتاۋدى شەكتەۋگە باعىتتالعان نورمالار جاس ۇرپاقتى قوعامعا جات قۇبىلىستاردان قورعاۋعا, وتباسى ينستيتۋتىن نىعايتۋعا, ۇلتتىق قۇندىلىقتاردى قۇرمەتتەۋگە جانە ادامگەرشىلىك-رۋحاني تاربيەنى قامتاماسىز ەتۋگە جاعداي جاسايدى.
جالپىلاي العاندا, ەنگىزىلىپ وتىرعان تۇزەتۋلەر ارحيۆ سالاسى مەن قۇجات اينالىمىن باسقارۋدىڭ قولدانىستاعى جۇيەسىن جاڭارتۋعا, ازاماتتاردىڭ الەۋمەتتىك قۇقىقتارىن قورعاۋدى كۇشەيتۋگە ءارى حالىقارالىق ستاندارتتارعا بەيىمدەۋگە باعىتتالىپ وتىر.
ايتا كەتەيىك, سەنات «مۇراعات ءىسى جانە قۇقىققا قارسى كونتەنتتىڭ تارالۋىن شەكتەۋ ماسەلەلەرى بويىنشا قازاقستان رەسپۋبليكاسىنىڭ كەيبىر زاڭنامالىق اكتىلەرىنە وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ءبىرىنشى وقىلىمدا قولدادى.