اتىراۋ وبلىسىندا اڭ اۋلاۋعا كەتىپ, ورالماعان اڭشى 4 كۇننەن بەرى ىزدەستىرىلىپ جاتىر. ءوڭىردىڭ قۇتقارۋشىلارى ەر ادامدى ىزدەۋ-قۇتقارۋ جۇمىسىنا بۇگىن تىكۇشاق پەن درون قىزمەتىن دە جۇمىلدىردى, دەپ جازادى Egemen.kz.
اتىراۋ وبلىستىق توتەنشە جاعدايلار دەپارتامەنتىنىڭ مالىمەتىنشە, جوعالعان تۇرعىندى ىزدەۋ جۇمىستارى كۇندىز-ءتۇنى ءۇزىلىسسىز جۇرگىزىلىپ جاتىر.
«ىزدەستىرۋ جۇمىستارىنا توتەنشە جاعدايلار دەپارتامەنتى, اتىراۋ وبلىستىق پوليتسيا دەپارتامەنتىنىڭ جەكە قۇرامى جانە جوعالعان ازاماتتىڭ دوستارى مەن تۋىستارى سىندى 43 ادام اتسالىسىپ جاتىر. سونداي-اق 11 تەحنيكا, تىكۇشاق پەن 3 درون جۇمىلدىرىلعان. بۇگىن قوسىمشا كۇش تارتۋ كوزدەلىپ وتىر», دەلىنگەن تجد تاراتقان حابارلامادا.
ايتا كەتەيىك, 14 جەلتوقسان كۇنى اتىراۋدان 100 شاقىرىم جەردەگى بوتاقان كەن ورنى اۋماعىندا 1964 جىلى تۋعان ەر ادام اڭ اۋلاۋعا كەتىپ, سول كۇيى ورالماعان.