Disney كومپانياسىنىڭ قارجىلاندىرۋىمەن كەزەكتى فيلم قازاق تىلىنە دۋبلياجدالدى, دەپ جازادى Egemen.kz.
الماتىدا «اۆاتار: وت پەن كۇل» ءفيلمىنىڭ تۇساۋكەسەرى ءوتتى. الەمگە تانىمال رەجيسسەر دجەيمس كەمەروننىڭ تۋىندىسى ەلىمىزدىڭ كينوتەاترلارىندا قازاق جانە ورىس تىلدەرىندە كورسەتىلەتىن بولادى. ايتا كەتكەن ءجون, بۇل قازاقشا دىبىستالعان ايگىلى رەجيسسەردىڭ العاشقى ءفيلمى ەمەس. 2022 جىلى «اۆاتار: سۋ جولى» كينوسى دا كورەرمەندەرگە قازاق تىلىندە جول تارتقان ەدى.
دۋبلياج رەجيسسەرى شاح-مۇرات ورداباەۆ بۇعان دەيىن قازاق تىلىندە دىبىستالعان فيلمدەرگە الەمدىك كومپانيا جوعارى باعا بەرگەنىن اتاپ ءوتتى.
– Disney ءبىزدى ءان ايتۋعا مىقتى, ولەڭ جازۋعا مىقتى مۋزىكالىق حالىق رەتىندە تانيدى. بۇعان دەيىن جوبالارىمىز ارقىلى ءوزىمىزدى وسى جاعىنان جاقسى كورسەتكەنبىز. ەندى «اۆاتار» سەكىلدى فيلم ارقىلى ءبىزدىڭ دۋبلياج درامادا دا مىقتى ەكەنىن تانىتپاقپىز. ال كەلەسى جىلعا كەلسەك, «اڭدار شاھارى 2» كاسسالىق تابىسى جاقسى بولدى. سول سەكىلدى «اۆاتاردىڭ» دۋبلياجى جاقسى كاسسا جيناسا, 2026 جىلى 5-9 ءفيلمدى دىبىستاۋعا تاپسىرىس بەرۋى مۇمكىن, – دەدى ول.