اقتوبەدە بەس جىلدان بەرى كوپپاتەرلى تۇرعىن ءۇي قۇرىلىسىنا قارجى سالعان 58 ۇلەسكەردىڭ شەشىلمەي كەلە جاتقان داۋىنا نۇكتە قويىلدى. تاۋەلسىزدىك مەرەكەسىندە وبلىس ورتالىعىنداعى «التىن وردا» شاعىن اۋدانىندا ۇزاققا سوزىلعان نىسان «Exclusive» تۇرعىن ءۇي كەشەنىندە تۇرعىندارعا پاتەر كىلتتەرى تابىستالدى, دەپ حابارلايدى Egemen.kz.
80 پاتەرلى كوپقاباتتى ءۇيدىڭ قۇرىلىسىن «Aktobe ROM Group» جشس-ءى باسشىلىعى 2021 جىلدىڭ ناۋرىزىندا باستاۋعا ۋادە ەتىپ, اياقسىز قالعان ەدى.
سوت شەشىمىمەن «Exclusive» تۇرعىن ءۇي كەشەنىنە قارجى سالعان ۇلەسكەرلەردىڭ 553 ملن تەڭگەگە شىعىنعا باتقاندارى راستالدى. جۇمىستى جالعاستىرۋدى 2022 جىلى قۇرىلعان «اقنيەت –2022» تۇرعىن ءۇي-قۇرىلىس كووپەراتيۆى مىندەتىنە الىپ, ەكى جىل ىشىندە اياقتادى.
ايتا كەتۋ كەرەك, كۇنى بۇگىنگە دەيىن 2021 جىلدان بەرى تۇرعىن ءۇي قۇرىلىسىنا ۇلەسكەرلىك ادىسپەن 6,3 ملرد تەڭگە قاراجات سالعان 845 اقتوبەلىكتىڭ ماسەلەسى وزەكتى بولىپ تۇر. ۇلەسكەرلىك داۋدى شەشۋ ماقساتىندا 2023 جىلى «اقتوبە قۇرىلىس كومپانياسى» جشس-ءى قۇرىلىپ, زارداپ شەگۋشىلەر مەن قۇرىلىس كومپانيالارىنىڭ اراسىنداعى ماسەلەنى زەرتتەۋگە الدى. قۇرىلىس ماتەريالدارىنىڭ قىمباتتاۋىنا بايلانىستى قاراجات جەتپەي قالعان سەرىكتەستەرگە قولداۋ كورسەتىلسە, جوسىقسىز مەردىگەرلەرگە قىلمىستىق ىستەر قوزعالدى.
وسى جىلى جۇرتتىڭ اقشاسىن الىپ, ء ۇيىن سالماعان ەكى تۇرعىن ءۇي كووپەراتيۆىنىڭ باسشىسى سوتتالدى. الداعى ۋاقىتتا پاتەرلەرى دايىن بولعان ۇلەسكەرلەرگە كەزەڭ-كەزەڭىمەن پاتەر كىلتتەرى تابىستالاتىن بولادى.
اقتوبە وبلىسى