تاۋەلسىزدىك كۇنىنە وراي ارىس قالاسىنا قاراستى اقدالا اۋىلىنىڭ جاستارى اسارلاتۋ داستۇرىمەن سالىنعان جاڭا باسپانانى دوسىباەۆتار اۋلەتىنە تابىس ەتتى, دەپ حابارلايدى Egemen.kz.
بارلىق تۇرمىستىق جاعدايى جاسالعان باسپانا 1981-2002 جىلدارى تۋعان اقدالا اۋىلى تۇرعىندارىنىڭ ورتاق كۇشىمەن بوي كوتەردى. قۇرىلىس جۇمىستارى بىرنەشە كەزەڭگە ءبولىنىپ, ءاربىرى ءوز مىندەتىن جاۋاپكەرشىلىكپەن اتقاردى. اۋىل ازاماتى وزىنە تيەسىلى جەر تەلىمىن قايىرىمدىلىق ماقساتتا تەگىن سىيعا بەرگەن.
باسپانا تابىستاۋ راسىمىنە اۋىل تۇرعىندارى قاتىسىپ, جاڭا قونىس يەلەرىنە اق تىلەكتەرىن ارنادى. اۋىل اقساقالدارى مەن زيالى قاۋىم وكىلدەرى جاستاردىڭ باسىن قوسىپ, قايىرىمدى ىسكە باستاماشى بولىپ جۇرگەن بەلسەندى ازاماتتارعا ريزاشىلىقتارىن ءبىلدىردى. ەڭبەگى ەلەنگەن ازاماتتارعا قۇرمەت كورسەتىلىپ, يىقتارىنا شاپان جابىلدى.
ايتا كەتەيىك, اقدالا اۋىلىنىڭ بەلسەندى جاستارى بۇعان دەيىن دە اسار داستۇرىمەن ءبىر مۇقتاج وتباسىن باسپانامەن قامتاماسىز ەتكەن بولاتىن. الداعى ۋاقىتتا اۋىل جاستارى قايىرىمدىلىق پەن ءوزارا قولداۋعا نەگىزدەلگەن بۇل يگى باستامانى جالعاستىرىپ, مۇقتاج وتباسىلار ءۇشىن تاعى ءبىر جاڭا باسپانا سالۋدى جوسپارلاپ وتىر.