وبلىستىق كوپبەيىندى بالالار اۋرۋحاناسىنىڭ انەستەزيولوگ-رەانيماتولوگ دارىگەرى ەلامان تاجەنوۆ «التىن مامان» اتاعىمەن ماراپاتتالدى. بۇل ماراپات مەملەكەت باسشىسى قاسىم-جومارت توقاەۆتىڭ «ادىلەتتى مەملەكەت. ءبىرتۇتاس ۇلت. بەرەكەلى قوعام» تۇجىرىمداماسى اياسىندا قوعامدا كەڭىنەن ناسيحاتتالىپ جاتقان «قازاقستان رەسپۋبليكاسىنىڭ ۇزدىك قىزمەتكەرلەرى» جوباسى شەڭبەرىندە بەرىلەدى, دەپ جازادى Egemen.kz.
بۇنداي جوعارى ماراپاتتى دارىگەردىڭ كاسىبي شەبەرلىگى مەن ادام ءومىرىن ساقتاۋداعى ەرەكشە ۇلەسى دالەلدەي ءتۇستى. سونىڭ ءبىر ايقىن مىسالى – جاقىن ارادا اقكول اۋدانىنان تۇسكەن شۇعىل شاقىرتۋ. سانيتارلىق اۆياتسيا ارقىلى اۋىر حالدەگى بالا جەتكىزىلدى جانە ەلامان تاجەنوۆتىڭ جەدەل ارەكەتى ارقاسىندا ناۋقاستىڭ ءومىرى ساقتالدى.
«سانيتارلىق اۆياتسيا ارقىلى اۋىر حالدەگى بالا تۋرالى حابار ءتۇستى. جەدەل كونسيليۋم ۇيىمداستىرىلىپ, الدىن الا دياگنوز قويىلدى — اۋىر اعىمدى مەنينگيت, تسەرەبرالدى اسقىنۋمەن. العاشقى شۇعىل كومەك كورسەتىلىپ, بالانىڭ جاعدايى تۇراقتاندىرىلعاننان كەيىن كوكشەتاۋ قالاسىنداعى وبلىستىق بالالار اۋرۋحاناسىنا جەتكىزىلدى», دەيدى دارىگەر.
ەلامان تاجەنوۆ مەديتسينا جولىن سانالى تۇردە تاڭداعان مامان. رەزيدەنتۋرانى الماتىداعى Mediterra حالىقارالىق كلينيكاسىنىڭ كلينيكالىق بازاسىندا وتكەن. وقۋ بارىسىندا ەرەسەكتەرمەن دە, بالالارمەن دە جۇمىس ىستەگەن, بىراق تاجىريبە كەزىندە بالالارمەن جۇمىس ىستەۋ وعان جاقىنىراق ەكەنىن تۇسىنگەن.
«ديپلوم العان سوڭ كوكشەتاۋ قالالىق ەمحاناسىندا ەرەسەكتەر رەانيماتسيا بولىمىندە قىزمەت اتقاردىم. بىراق ۋاقىت وتە كەلە بالالار مەديتسيناسى – مەنىڭ شىنايى باعىتىم ەكەنىن ۇقتىم», دەيدى دارىگەر.
جاقىندا ەلامان تاجەنوۆ قازاقستاننىڭ ءار وڭىرىنەن جينالعان 15 دارىگەرمەن بىرگە گەرمانيانىڭ ميندەن قالاسىنداعى كلينيكالىق بازادا بىلىكتىلىگىن ارتتىردى.
«گەرمانيادا ەڭ الدىمەن ناۋقاس پەن دارىگەرگە قولايلى جاعداي جاساۋ الدىڭعى ورىنعا قويىلادى. كلينيكادا ءبارى ءبىر عيمارات ىشىندە: مەديتسينالىق فورما, دەمالىس ايماعى, قاجەتتى جابدىق. بۇل جۇمىس تيىمدىلىگىنە تىكەلەي اسەر ەتەدى», دەيدى ول.
ونىڭ ايتۋىنشا, قازاقستاندىق مەديتسينا شەتەلدەن كەم تۇسپەيدى. نەگىزگى ەرەكشەلىك – ۇيىمداستىرۋ, لوگيستيكا جانە تەحنولوگيالىق قامتاماسىز ەتۋ دەڭگەيى.
الداعى ۋاقىتتا دارىگەر مەن ارىپتەستەرى بالالار اۋرۋحاناسىنا ۋلترادىبىستىق ناۆيگاتسيانى (ۋزي-ناۆيگاتسيا) جانە رەانيماتسيالىق كومەكتىڭ زاماناۋي ادىستەرىن تولىق ەنگىزۋدى جوسپارلاپ وتىر. بۇل اسىرەسە ءينۆازيۆتى مانيپۋلياتسيالاردىڭ قاۋىپسىزدىگىن ارتتىرۋعا مۇمكىندىك بەرەدى.
— مەديتسيناعا ۇلكەن تابىس ءۇشىن ەمەس, ادامعا كومەگىم ءتيسىن دەگەن نيەتپەن كەلۋ كەرەك. سوندا عانا بۇل ماماندىقتىڭ شىنايى ءمانىن تۇسىنەسىڭ, — دەپ تۇيىندەدى تاجەنوۆ.