وسكەمەندە ماي ونەركاسىبى سالاسىندا زاماناۋي جانە ەڭ جوعارى تەحنولوگيالى كاسىپورىنداردىڭ ءبىرى سانالاتىن ALTAI MAI تولىق تسيكلدى ماي ەكستراكتسيالىق زاۋىتىنىڭ سالتاناتتى اشىلۋى ءوتتى. زاۋىت ءونىمى جوعارى ساپالى بولادى ءارى ءوندىرىستىڭ ەكولوگيالىق قاۋىپسىزدىگى ساقتالعان, دەپ جازادى Egemen.kz.
ينۆەستيتسيا سوماسى 26 ملرد تەڭگەدەن اسقان
جاڭا كەشەن مايلى داقىلداردى وڭدەۋدىڭ شيكىزاتتى قابىلداۋدان باستاپ ونى دايىنداۋ, ەكستراكتسيالاۋ, رافيناتسيالاۋ جانە دايىن ءونىمدى قاپتاۋعا دەيىنگى بارلىق كەزەڭدەرىن قامتيدى.
جوبانى جۇزەگە اسىرۋ 2021 جىلى باستالعان. جالپى ينۆەستيتسيا كولەمى 26 ملرد تەڭگەدەن استى, ونىڭ ىشىندە 2,5 ميلليارد تەڭگە جەرگىلىكتى بيۋدجەتتەن ءبولىندى.
تاۋلىگىنە 500 توننا كۇنباعىس ءدانى
كاسىپورىننىڭ وندىرىستىك قۋاتتىلىعى – تاۋلىگىنە 500 توننا كۇنباعىس ءدانىن قامتيدى. زاۋىت وسىمدىك مايلارى, شروت جانە پەللەتتەر وندىرەدى, بۇل شيكىزاتتى ءتيىمدى پايدالانۋ مەن ىشكى جانە سىرتقى نارىقتا سۇرانىسقا يە ءونىم تۇرلەرىن كەڭەيتۋگە مۇمكىندىك بەرەدى.
كومپانيا وكىلدەرىنىڭ ايتۋىنشا, ءاربىر شيكىزات پارتياسى كوپساتىلى ساپانى باقىلاۋدان وتەدى, وندىرىستە ەكولوگيالىق تازا تەحنولوگيالار ەنگىزىلگەن, ولار قورشاعان ورتاعا اسەردى ازايتىپ, حالىقارالىق ستاندارتتارعا سايكەس كەلەدى.