باتىس قازاقستان وبلىسىندا بوراندا اۋىل تۇرعىنى قازا تاپتى

ەلەكتر جارىعى ءوشىپ قالدى

بقو ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ باسشىسى بەيىمبەت ءمۋسيننىڭ ايتۋىنشا, 13-ىنەن 14-ىنە قاراعان ءتۇنى بولعان بوران كەزىندە 6 اۋدانىندا 16 مىڭعا جۋىق ابونەنت ەلەكتر جارىعىنسىز قالعان. سونىڭ ىشىندە اقجايىق اۋدانىندا – قابىرشاقتى اۋىلى, بوكەي ورداسى اۋدانىندا – 18 ەلدى مەكەن, تاسقالا اۋدانىندا – 8 اۋىل, بايتەرەك اۋدانىندا – 9, جانىبەك اۋدانىندا – 12 ەلدى مەكەن, قازتالوۆ اۋدانىندا – 16 اۋىل جارىقسىز قالعان. قالپىنا كەلتىرۋ جۇمىستارى ۇزدىكسىز جۇرگىزىلىپ, 15 جەلتوقسان كۇنى تۇسكى ساعات 12:30-عا دەيىن بايتەرەك, اقجايىق جانە تاسقالا اۋداندارىندا ەلەكترمەن جابدىقتاۋ تولىق قالپىنا كەلتىرىلگەن. ءدال قازىرگى ۋاقىتتا ءالى 3 641 ابونەنت جارىقسىز قالىپ وتىر. 119 ادامنان تۇراتىن 24 بريگادا ەلەكتر جەلىلەرىن جوندەپ جاتىر.

ء«بىر ءتاۋىرى وڭىردە گاز جەلىسىندە اقاۋ جوق, جاعداي تۇراقتى» دەيدى بەيىمبەت مۋسين.

سۋ مۇناراسى قۇلادى

13 جەلتوقسان كۇنى ساعات 18:00-دە قاتتى جەل سالدارىنان سايحىن اۋىلىندا رەزەرۆ رەتىندە پايدالانىلاتىن قوسىمشا سۋ مۇناراسى قۇلاپ تۇسكەن.

«بىراق بۇل جاعداي حالىقتى سۋمەن قامتاماسىز ەتۋگە اسەر ەتكەن جوق, ويتكەنى نەگىزگى مۇنارا تولىق كولەمدە جۇمىسىن ىستەپ تۇر» دەيدى ماماندار.

جاڭاقالا اۋدانىندا توتەنشە جاعدايعا بايلانىستى جۋالى اۋىلىندا – 364 ادام, جاڭاقازان اۋىلىندا – 1850 ادام, جاڭاجولدا – 852 ادام, سارىكولدە – 424 ادام, جالپى سانى – 3490 ادام اۋىز سۋسىز قالعان.

قاتتى جەل ۇيلەردىڭ شاتىرىن ۇشىرىپ اكەتتى

قاتتى جەل جاڭاقالا اۋدانى جاڭاقازان اۋىلدىق وكرۋگىندەگى ەكى قاباتتى, 18 پاتەرلى تۇرعىن ءۇيدىڭ, سونداي-اق اۋىلدىق اكىمدىك عيماراتىنىڭ شاتىرىن زاقىمداپ, تاسقالا اۋدانى ورتالىعىنداعى جاتاقحانا عيماراتىنىڭ شاتىرىن ج ۇلىپ كەتكەن. جاتاقحانادا بارلىعى 60 بولمە بار ەكەن, ونىڭ 25 بولمەسىندە 57 ادام تۇرعان. ونىڭ ىشىندە 2 ادام ۋاقىتشا «شۇعىلا» لاگەرىنە كوشىرىلگەن. قالعان تۇرعىندار ءوز بولمەلەرىندە قالاتىنىن نەمەسە جاقىن تۋىستارىنا كوشەتىنىن ايتقان. شاتىردى جوندەۋ جۇمىسى 15 جەلتوقساندا باستالدى.

جاعداي وبلىس اكىمىنىڭ باقىلاۋىندا

وقىس وقيعا قالىپتاسقالى بەرى باتىس قازاقستان وبلىسىنىڭ اكىمى ناريمان تورەعاليەۆ ەنەرگەتيكا سالاسىنا جاۋاپتى ورگانداردىڭ قاتىسۋىمەن جينالىس وتكىزىپ, احۋالدى جەكە باقىلاۋىنا العانى حابارلاندى. وبلىس اكىمى وڭىرلىك ەلەكتر جەلىلەرى ۇيىمدارىنا, توتەنشە جاعدايلار قىزمەتتەرىنە جانە جەرگىلىكتى اتقارۋشى ورگاندارعا ەلەكترمەن جابدىقتاۋدى قالپىنا كەلتىرۋ جۇمىستارىن جەدەلدەتۋ جونىندە ناقتى تاپسىرمالار بەرگەن. قازىر وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىعى باسقارماسى حالىقتى قاجەتتى يگىلىكتەرمەن ۇزدىكسىز قامتاماسىز ەتۋ ءۇشىن كۇشەيتىلگەن رەجىمدە قىزمەت ەتىپ جاتىر.

مەكتەپ وقۋشىلارى قاشىقتان وقىتۋعا جىبەرىلدى

باتىس قازاقستان وبلىسىندا قولايسىز اۋا رايى جاعدايىنا بايلانىستى كەيبىر مەكتەپتەر ءبىلىم بەرۋ پروتسەسىن ۋاقىتشا قاشىقتان وقىتۋ فورماتىنا كوشىردى. اتاپ ايتقاندا اقجايىق اۋدانىندا – 1 مەكتەپ (5 وقۋشى), بوكەي ورداسى اۋدانىندا – 12 مەكتەپ, 738 وقۋشى, ءبورلى اۋدانىندا – 24 مەكتەپ, 10074 وقۋشى, جانىبەك اۋدانىندا – 14 مەكتەپ, 2442 وقۋشى, قازتالوۆ اۋدانىنىڭ 35 مەكتەپ ساباقتى 20 جەلتوقسانعا اۋىستىردى.

بوراندا جوعالىپ كەتكەندەر دە بار

وكىنىشكە قاراي, بوران كەزىندە ۇيىنەن شىعىپ كەتىپ, قاپيا قازاعا ۇشىراعان وقيعالار دا بولىپ جاتىر. 15 جەلتوقسان كۇنى تۇسكى ساعات 12.00 شاماسىندا جانىبەك اۋدانىنا قاراستى كۇيگەنكول اۋىلى ماڭىندا 1968 جىلى تۋعان ازاماتتىڭ ءولى دەنەسى تابىلدى. الدىن الا دياگنوزى – سۋىقتان ءۇسىپ ولگەن.

قازىر جانىبەك اۋداندىق پوليتسيا ءبولىمى 1966 جىلى تۋعان م. دەگەن ازاماتتى, ال قازتالوۆ اۋداندىق پوليتسيا قىزمەتكەرلەرى 1990 جىلى تۋعان ە. دەگەن ازاماتتى ىزدەستىرىپ جاتىر.

13 جەلتوقساندا جانىبەك اۋدانى بورسى اۋىلدىق وكرۋگىندەگى تەگىسشىل ەلدى مەكەنىنەن تراكتورمەن شىعىپ, تاۋ اۋىلدىق وكرۋگىنە قاراستى جىگەر قىستاعىنا 200 باس ءىرى قارا مالدى ايداپ بارا جاتقان ەكى ازامات تا حابارسىز كەتىپ, ابىروي بولعاندا امان تابىلدى.

قازىر باتىس قازاقستان وبلىسىنىڭ وڭتۇستىك اۋداندارىندا سەكۋندىنا 20-30 مەترگە دەيىن كۇشتى جەل سوعىپ تۇر. سينوپتيكتەر 16 جەلتوقساندا وبلىستىڭ سولتۇستىگىندە, شىعىسىندا ازداعان قار جاۋىپ, جاياۋ بۇرقاسىن جۇرەتىنىن, 17 جەلتوقساندا كۇندىز وبلىستىڭ باتىسىندا, سولتۇستىگىندە, شىعىسىندا قار جاۋاتىنىن حابارلادى. 19 جەلتوقساندا وبلىستىڭ سولتۇستىگىندە, شىعىسىندا قار, جاياۋ بۇرقاسىن بولسا, وبلىستىڭ باتىسىندا, وڭتۇستىگىندە, شىعىسىندا تۇمان تۇسەدى. اۋا تەمپەراتۋراسى تۇندە 15-20 گرادۋسقا دەيىن اياز بولماق.

سوڭعى اقپاراتقا قاراعاندا باتىس قازاقستان وبلىسىندا سوڭعى كۇندەرى بورانعا ۇشىپ قازا تاپقان 3 ادامنىڭ دەنەسى تابىلعان. ولار - جانىبەك اۋدانىنان ە.وتەشوۆ, 1968 ج.ت.; بوكەيوردا اۋدانىنان - ە.حاجعاليەۆ, 2000 ج.ت., قازتالوۆ اۋدانىنان - ە.قوڭقاقوۆ (1990 ج.ت.). ولاردىڭ ءبارى دە ءۇسىپ ولگەن. اقجايىق اۋدانىندا جوعالىپ كەتكەن 54 جاستاعى ت.ءىلياسوۆ امان تابىلدى, قول-اياعى ۇسىگەن ناۋقاس قازىر ورال قالاسىنا جەتكىزىلگەن. جانىبەك اۋدانىندا جەلتوقساننىڭ 13-ءى كۇنى كۇيگەنكول اۋىلىنان بۇقار قىستاعىنا شىعىپ كەتكەن 1966 ج.ت. م.ەدىلباەۆتى ىزدەۋ جالعاسىپ جاتىر.

باتىس قازاقستان وبلىسى