كوز دارىگەرى مۇحيت قۇلماعانبەتوۆتىڭ Entoptica ستارتاپى گونكونگ پەن ازياداعى بەدەلدى تەحنولوگيالىق ماراپاتتاردىڭ ءبىرى – گونكونگ اقپاراتتىق جانە كوممۋنيكاتسيالىق تەحنولوگيالار (ICT) سىيلىعىندا الەمدىك دەڭگەيدە مويىندالدى, دەپ حابارلايدى Egemen.kz.
ونىڭ جوباسى ICT Startup Award – Hardware and Device نوميناتسياسى بويىنشا ۇزدىك دەپ تانىلدى جانە SLOPE اتتى يننوۆاتسيالىق قۇرىلعىسى التىن جۇلدەنى جەڭىپ الدى. قازىلار القاسى بۇل تەحنولوگيالىق جوبانىڭ مەديتسينا ءۇشىن ماڭىزدىلىعىن جوعارى باعالادى.
جاڭا قۇرىلعى كوزدىڭ تورقابىعىندا جاسقا بايلانىستى پايدا بولاتىن اۋرۋلاردى ەرتە ساتىسىندا انىقتاۋعا مۇمكىندىك بەرەدى. دياگنوستيكا كەزىندە ەشقانداي وتا جاسالمايدى, ءدارى-دارمەك نەمەسە اۋىر پروتسەدۋرالار قولدانىلمايدى. اۋرۋدى انىقتاۋ تەك جارىق پەن تولقىن تەحنولوگيالارى ارقىلى جۇزەگە اسادى.
مۇحيت قۇلماعانبەتوۆ – قىزىلوردا وبلىسى, قالجان احۋن اۋىلىنىڭ تۋماسى. ول كاسىبي ورتادا كۆانتتىق وفتالمولوگيا سالاسىنىڭ وكىلى رەتىندە تانىمال.
ء«بىز جاساعان SLOPE قۇرىلعىسى كوزدىڭ جاسقا بايلانىستى ماكۋلوديستروفياسىن (AMD) ەرتە انىقتاۋعا مۇمكىندىك بەرەدى. قازىلار القاسى تەحنولوگيامىزدىڭ يننوۆاتسياسىن جانە قوعامعا تيگىزەتىن وڭ اسەرىن ەرەكشە اتاپ ءوتتى. جوبامىز حالىقارالىق دەڭگەيدە جەڭىسكە جەتكەن كەزدە بويىمدى ماقتانىش سەزىمى بيلەدى. بولاشاقتا وسىنداي وزىق تەحنولوگيالاردى قازاقستانعا اكەلىپ, ەلىمىزدىڭ دەنساۋلىق ساقتاۋ سالاسىن جاڭا دەڭگەيگە كوتەرگىم كەلەدى. وتانداستارىما قولجەتىمدى, زاماناۋي جانە ءتيىمدى مەديتسينالىق شەشىمدەر ۇسىنۋ – باستى ماقساتىم», دەيدى جەڭىمپاز.
Hong Kong ICT Awards پرەمياسى 2006 جىلى گونكونگ ۇكىمەتىنىڭ قولداۋىمەن قۇرىلعان. بۇگىندە بۇل سىيلىق اقپاراتتىق-كوممۋنيكاتسيالىق تەحنولوگيالار سالاسىنداعى ەڭ بەدەلدى ماراپاتتاردىڭ ءبىرى بولىپ ەسەپتەلەدى جانە تەحنولوگيالىق ءارى مەديتسينالىق جوبالاردىڭ حالىقارالىق دەڭگەيدە مويىندالۋىنىڭ سيمۆولى سانالادى.