«BalaTurkvizyon» حالىقارالىق بالالار ءانى بايقاۋىنىڭ الماتى وبلىسى بويىنشا جارتىلاي ءفيناليسى انىقتالدى.
ءاليا نازارباەۆانىڭ «جاندانۋ الەمى» قورىنىڭ جوباسى «Bala Turkvizyon-قازاقستان» حالىقارالىق بالالار ءانى بايقاۋىنىڭ سوڭعى ۇلتتىق ىرىكتەۋ كەزەڭى الماتى وبلىسىندا ءوز مارەسىنە جەتتى.
ون التىنشى ايماقتىق ىرىكتەۋ تالدىقورعان قالاسىندا ءوتتى. الماتى وبلىسىنىڭ 100-دەن اسا ونەرپازى جەتىسۋدىڭ ورتالىعىنا وبلىس نامىسىن رەسپۋبليكالىق بايقاۋدىڭ فينالىندا قورعاۋ ءۇشىن جينالدى.
ال ون ەكى جاستاعى نۇربەك نۇرىم ۇزىناعاش اۋىلىنان «ۇزىناعاش» ونەر مەكتەبىندە ءتالىم الاتىن جەرلەستەرىمەن بىرگە كەلدى. ول ەسترادا-ۆوكال سىنىبىندا جانە فورتەپيانودا ويناۋدى كاسىبي تۇردە ۇيرەنۋدە. جول كورسەتەتىن جەتەكشىسى – قىدىربەك اكىمجانوۆ. بايقاۋعا ونەرپاز ساكەن مايعازيەۆتىڭ ورىنداۋىنداعى «اسىل انا» ءانى مەن «ساناتا ليۋچيا» ارياسىن دايىنداپ كەلىپتى. «ءبىز بايقاۋعا 250 شاقىرىم قاشىقتىقتى ارتقا تاستاپ كەلدىك. بەكەر كەلگەن جوقپىز. ءبىزدىڭ شاكىرتتەرىمىز ونەر ادامدارىمەن تانىسىپ, تەلەۆيزيالىق تۇسىرىلىمدەرگە ءتۇسىپ, ءوز ونەرلەرىن كورسەتتى. ولار وتە قۋانىشتى. ۇيىمداستىرۋشىلار القاسىنىڭ بالالارعا جاساعان وسىنداي ۇلكەن سىيىنا العىس ايتامىز», – دەيدى جەتەكشىلەرى.
الماتى وبلىسى بويىنشا جارتىلاي فينال جەڭىمپازى بولىپ جاركەنت قالاسىنىڭ تۇرعىنى اقجان بايزاق تانىلدى. ول 12 جاستا. كوپ بالالى وتباسىنىڭ كوپتەن كۇتكەن جانە كەنجە بالالارى. بالانىڭ اناسى ايجان بايزاقتىڭ ايتۋىنشا, ۇلى ءۇش جاسىنان باستاپ ءان سالا باستاعان جانە العاش ورىنداعان اندەرىنىڭ سوزدەرى دە كۇردەلى حالىق اندەرى بولعان ەكەن. «نەگىزىندە اقجاننىڭ وجەت مىنەزى مەن قايسارلىعىنىڭ, شاپشاڭدىعىنىڭ ارقاسىندا ارماندارى ورىندالۋدا. مۋزىكالىق ءبىلىمى جوق بولسا دا, كوپتەگەن بايقاۋلاردىڭ جەڭىمپازى اتانىپ ۇلگەردى», – دەيدى اناسى.
ول قالالىق مەرەكەلەر مەن كونتسەرتتەردىڭ تۇراقتى قوناعى بولىپ تابىلادى. اننەن بولەك, اقجان سپورتپەن دە اينالىسادى, گرەك-ريم كۇرەسى مەن سۋعا سەكىرۋ دەگەندەي. «جاتتىقتىرۋشىسى دا بالانىڭ سپورتتاعى جەتىستىكتەرىنىڭ جاقسى ەكەنىن ايتىپ, ۆوكالعا دايىندىققا جىبەرگىسى كەلمەيدى», – دەيدى اناسى. ال اقجاننىڭ ايتۋى بويىنشا, سپورتپەن شۇعىلدانۋ ونىڭ ساحنادا سىمباتتى كورىنۋىنە سەپتىگىن تيگىزەدى ەكەن. ول روزا رىمباەۆا, ءالي وقاپوۆ, سەرىك يبراگيموۆتى ۇلگى تۇتادى. جاقىندا ول كلارنەت سىنىبى بويىنشا مۋزىكا مەكتەبىندە وقۋىن جالعاستىرادى.
اقجان بايزاق ەندى الماتىداعى «جۇلدىزدى ۇيگە» ۇلتتىق ىرىكتەۋدىڭ فينالىنا دايىندالۋعا كەلەدى. ۇلتتىق ىرىكتەۋدىڭ فينالى استانا قالاسىندا قىركۇيەكتىڭ 16-17 كۇندەرى وتەدى. ايماقتىق ىرىكتەۋلەر ءوز مارەسىنە جەتتى, بىراق «Bala Turkvizyon-قازاقستان» جارتىلاي فينال جەڭىمپازدارىن الدا قىزۋ دايىندىق جانە تۇركيانىڭ ىستامبۇل قالاسىندا تۇركى ءتىلدى 20 ەلدىڭ اراسىندا وتەتىن ۇلكەن دودادا ەل نامىسىن قورعاۋ مۇمكىندىگى كۇتۋدە.
«ەگەمەن-اقپارات».