اياقتالىپ كەلە جاتقان جىل TikTok–قازاقستان ءۇشىن جامان اياقتالماعان سىڭايلى. 2025 جىلى وتانداستارىمىز وسى پلاتفورمادا #ناۋرىز2025 جانە #نەتاماشالايمىز سىندى ترەندتىك حەشتەگتەرىمەن بەلسەندى كونتەنت جاساپ, دجەننيفەر لوپەس, Backstreet Boys سىندى الەم جۇلدىزدارىنىڭ كونتسەرتتەرىنەن تۇسىرگەن بەينەلەرىن ءبولىسىپ, فۋتبولشىلارىمىزدىڭ چەمپيوندار ليگاسىنداعى جەتىستىكتەرىن ءجىتى قىزىعۋشىلىقپەن باقىلاپ وتىرعانى ايان, دەپ جازادى Egemen.kz.
جىلداعى ءداستۇر بويىنشا جەتەكشى پلاتفورما جۋرناليستەرمەن كەزدەسىپ, باق وكىلدەرىنە باستامالار مەن جەتىستىكتەرى جايلى ەگجەي-تەگجەيلى باياندادى.
بيىل قازاقستان TikTok-تا ناعىز ترەندسەتتەرگە اينالعان. يندونەزيا مەن كورەيادان باستاپ مەكسيكا مەن اقش-قا دەيىنگى ءتۇرلى ەل قولدانۋشىلارى قازاقستانعا ارنالعان جەكە ترەند قالىپتاستىردى. شەتەلدىك كرەاتورلار قازاق مادەنيەتىنە ەرەكشە قىزىعۋشىلىق تانىتىپ, «I’m not Kazakh, but…» ترەندى اياسىندا قازاقستاندىق ارتىستەردىڭ اندەرىن ورىندادى. قاتىسۋشىلاردىڭ مۋزىكالىق تاڭداۋى دا ءار الۋان بولىپ, قايرات نۇرتاس پەن ءسادرادديننىڭ حيت اندەرى, قايرات باەكەنوۆ پەن «فورمات» توبىنىڭ كومپوزيتسيالارى, سونداي-اق ديماش قۇدايبەرگەننىڭ كۇردەلى ۆوكالدىق پارتيالارى تىڭدارماندارىن كوبەيتە ءتۇستى. كەيبىر ۇلتتىق اسپاپتارمەن ورىندالاتىن حالىق اۋەندەرىنە بەينەباياندار ءتۇسىرىلىپ, فلەشموبقا ەرەكشە ۇلتتىق رەڭك بەرىلگەن.
وسى ورايدا قولدانۋشىلار پلاتفورمانىڭ ەڭ بەلسەندى جانە ەرەكشە اۆتورلارىن انىقتاعان #قاۋىمداستىقتاڭداۋى2025 بايقاۋى – TikTok-تاعى بيىلعى جىلدىڭ ماڭىزدى وقيعالارىنىڭ قاتارىنا كىردى.
بيىل ەڭ ۇزدىك ويىن-ساۋىق كونتەنتىنىڭ اۆتورى رەتىندە قازاق تىلىندە كينولارعا شولۋ جاساپ, پرەمەرالار تۋرالى اقپاراتتار مەن كەڭەستەر بەرىپ وتىرعان @daulenuly اككاۋنتىنىڭ يەسى نۇربەك قاسىمبەكوۆتىڭ ەسىمى اتالدى.
«ەڭ ۇزدىك سپورتتىق كرەاتور» نوميناتسياسىندا سپورت جاڭالىقتارى تانىمال تۇلعالاردىڭ بىرىنە اينالعان @temirlan_erzhanovich اككاۋنتىنىڭ يەسى تەمىرلان ورىنباەۆ توپ جاردى
ال «ەڭ ۇزدىك تانىمدىق كونتەنت اۆتورى» اتانعان التىناي وتەگەنوۆا @altynai_qazaq_tili – قازاق ءتىلىن ۇيرەنۋگە ارنالعان تانىمدىق كونتەنتپەن ءبولىسىپ, لەكسيكا مەن ەرەجەلەردى ءتۇسىندىرىپ, كوپتىڭ ءبىلىمىن كەڭەيتۋگە, مادەني مانماتىنگە تەرەڭىرەك بويلاۋىنا كومەكتەستى.
نايليا پاۆلوۆسكايا @nyakushkaa – قاراپايىم ءارى ءدامدى اس مازىرلەرىمەن ءبولىسىپ ءبولىسىپ, كورەرمەندەردى اسپازدىق تاجىريبەلەرگە شابىتتاندىرعانى ءۇشىن «ەڭ ۇزدىك اسپازدىق كرەاتور» اتاندى.
ەڭ ۇزدىك ساياحات كونتەنتىنىڭ اۆتورى جۇلدىز راحمەت @zhuldyz_rakhmet – ترەۆەل-جۋرناليست, پلاتفورما قولدانۋشىلارى ءۇشىن قازاقستاننىڭ كورىكتى جەرلەرىن تانىستىراتىن ۆيرتۋالدى گيدكە اينالدى. اۆتور وسى نوميناتسيادا ەكىنشى جىل قاتارىنان جەڭىسكە جەتتى, بۇل ونىڭ ەل ىشىندەگى ساپارلارىنىڭ اۋديتوريا ءۇشىن وزەكتى ءارى قىزىقتى ەكەنىن دالەلدەيدى.
ۇلت قازىناسى @ult_kazynasy اككاۋنتىنىڭ اۆتورلارى – ناريمان قارابالين, بيسۇلتان ومىرباەۆ, باۋىرجان تىلەۋحانوۆ پەن ءادىل يمانتاەۆتار وڭىرلەردىڭ مادەني جانە تىلدىك ەرەكشەلىكتەرىن كورسەتىپ, قازاقستان تاريحىنا ارنالعان بەينەباياندارى ءۇشىن «ەڭ ۇزدىك مادەنيەت كونتەنتىنىڭ اۆتورى» اتاندى.
ەڭ ۇزدىك شاعىن بيزنەس اككاۋنتىنىڭ يەسى @doner_na_satpayeva_ – بەينەباياندارىندا ءوز كليەنتتەرىن قىزعىلىقتى ناسيحاتتاپ وتىرعان.
جەتەكشى پلاتفورمانىڭ ەكونوميكاداعى ىقپالىن جوققا شىعارۋعا بولمايدى. TikTok پەن «اتامەكەن» ۇلتتىق كاسىپكەرلەر پالاتاسى قازاقستانداعى شاعىن جانە ورتا بيزنەسكە پلاتفورمانىڭ اسەرىن باعالاۋعا ارنالعان العاشقى زەرتتەۋىن جۇرگىزىپ, ناتيجەسىندە TikTok-تى اپتاسىنا كەمىندە ءبىر رەت پايدالاناتىن ءاربىر سەگىزىنشى كاسىپكەر كىرىسىنىڭ جارتىسىنان استامىن پلاتفورمانىڭ ارقاسىندا قالىپتاستىراتىنى انىقتالعان.
«بيىلعى جىل شىعارماشىلىق, تانىمدىق كونتەنتتىڭ قانشالىقتى كۇشكە يە ەكەنىن ايقىن كورسەتىپ, ءبىلىم تاراتۋدا, مادەني مۇرانى ساقتاۋدا, ءپوزيتيۆتى تسيفرلىق ورتانى قالىپتاستىرۋدا ماڭىزدى ءرول اتقارادى. Discover List 2025 تىزىمىنە العاش رەت قازاقستاندىق پەداگوگتىڭ ەنۋى – ءبىز ءۇشىن ۇلكەن جەتىستىك, ال ءۇشىنشى جىل قاتارىنان ءوتىپ جاتقان ناۋرىز فەستيۆالىمىز پلاتفورمامىزداعى ەڭ ءىرى مادەني وقيعا دەڭگەيىنە كوتەرىلدى. الداعى ۋاقىتتا دا قولدانۋشىلارعا ءوزىن ەركىن, قاۋىپسىز جانە شىعارماشىلىق تۇرعىدا كورسەتۋگە مۇمكىندىك بەرە وتىرىپ, اۆتورلاردى قولداۋدى, تسيفرلىق ساۋاتتىلىقتى ارتتىرۋ باستامالارىن دامىتۋدى, مادەنيەتتەر اراسىنداعى بايلانىستى نىعايتۋدى جالعاستىرا بەرەمىز», دەدى TikTok كومپانياسىنىڭ شىعىس ەۋروپا جانە ورتالىق ازيا بويىنشا وپەراتسيالىق ءبولىم باسشىسى مەليس چاگلار.