10 جەلتوقسان كۇنى نيۋ-دەليدە وتكەن يۋنەسكو-نىڭ ۇكىمەتارالىق كوميتەتىنىڭ 20-سەسسياسىندا قازاق, قىرعىز جانە قاراقالپاق حالىقتارىنىڭ ءداستۇرلى كيىز ۇيلەرى ادامزاتتىڭ ماتەريالدىق ەمەس مادەني مۇراسىنىڭ تىزىمىنە ەنگىزىلدى. سونىمەن قاتار وزبەكستاننىڭ ۇسىنىسى بويىنشا قوبىزدى جاساۋ جانە ورىنداۋ ونەرى دە وسى تىزىمگە ەندى, دەپ جازادى Egemen.kz.
يۋنەسكو جاريالانىمىندا كيىز ۇيلەردىڭ حالىقتىق مەرەكەلەردىڭ, ءداستۇرلى سالت-جورالاردىڭ, سونداي-اق جەرلەۋ جانە ەسكە الۋ راسىمدەرىنىڭ اجىراماس بولىگى بولىپ قالاتىنى اتاپ وتىلگەن. كيىز ۇيلەر وتباسىلاردا قاسيەتتى مۇرا رەتىندە ساقتالىپ, ۇرپاقتان-ۇرپاققا بەرىلەدى.
كيىز ءۇيدى يۋنەسكو تىزىمىنە ەنگىزۋ تۋرالى باستاپقى بىرلەسكەن ءوتىنىم قازاقستان, قىرعىزستان جانە وزبەكستان تاراپىنان 2024 جىلى بەرىلگەن. كەيىنىرەك وزبەكستان ءوتىنىمدى كەڭەيتۋدى ۇسىنىپ, وعان قاراقالپاق ءداستۇرىن قوسۋدى ۇسىنعان. نوميناتسيا ماتەريالدارىندا كيىز ءۇي قازاقتار, قىرعىزدار جانە قاراقالپاقتار ءۇشىن تەك تۇرعىن ءۇي عانا ەمەس, ۇلتتىق بولمىستىڭ سيمۆولى ەكەنى, ال ونى جاساۋعا قاتىستى شەبەرلىك ۇرپاقتان-ۇرپاققا بەرىلەتىنى كورسەتىلگەن.
وزبەكستان پرەزيدەنت اكىمشىلىگىنىڭ باسشىسى سايدا ميرزيەەۆا بۇل جاڭالىقتى ءوز Telegram-ارناسىندا: «بۇل – ءبىزدىڭ مادەنيەتىمىزدىڭ جەڭىسى. داستۇرلەرىمىزدىڭ تەرەڭدىگى مەن رۋحاني مۇرامىزدىڭ قۋاتىن دالەلدەيتىن حالىقارالىق دەڭگەيدەگى مويىنداۋ», دەپ اتاپ ءوتتى.
ول شەبەرلەرگە, زەرتتەۋشىلەرگە جانە ءداستۇردى ساقتاۋشىلارعا العىس ءبىلدىردى.
يۋنەسكو بيىل بارلىعى 68 ءوتىنىمدى قاراستىرىپ جاتىر. قازىرگى تاڭدا ۇيىمنىڭ ماتەريالدىق ەمەس مادەني مۇرا تىزىمىندە 153 ەلدەن 812 ەلەمەنت بار.