قاسىم-جومارت توقاەۆ قازاق-يران قارىم-قاتىناسىن نىعايتۋعا زور ۇلەس قوسىپ كەلە جاتقان پرەزيدەنت ماسۋد پەزەشكيانعا العىس ايتتى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
مەملەكەت باسشىسى ەكى ەل اراسىنداعى الىس-بەرىستىڭ قارقىنى جوعارى ەكەنىن, بۇگىنگى ءىس-شارا ەكونوميكا جانە ينۆەستيتسيا سالاسىنداعى ىنتىماقتاستىقتى بەكەمدەي تۇسەتىنىن جەتكىزدى.
«بىلتىر ساۋدا-ساتتىعىمىز 340 ميلليون دوللاردان اسقان بولاتىن. بيىل بۇل كورسەتكىش بىرنەشە ەسە ارتادى دەگەن بولجام بار. ءبىز ەلدەرىمىز اراسىنداعى تاۋار اينالىمىن ايتارلىقتاي ۇلعايتىپ, ەڭ الدىمەن, 1 ميلليارد دوللارعا, سودان كەيىن ەكىنشى كەزەڭدە 2 ميلليارد دوللارعا دەيىن جەتكىزۋگە كەلىستىك. بۇعان الەۋەتىمىز تولىق جەتەدى. وسى ورايدا, تەگەران قالاسىندا قازاقستاننىڭ ساۋدا ءۇيىن اشۋ جونىندەگى باستامانىڭ ماڭىزى زور. بۇل باستاما وتاندىق ونىمدەردى يران نارىعىنا جۇيەلى تۇردە جەتكىزىپ تۇرۋعا مۇمكىندىك بەرەدى. ينۆەستيتسيا سالاسىنداعى بايلانىسىمىز كۇشەيىپ كەلەدى. سوڭعى 20 جىلدا يران يسلام رەسپۋبليكاسى قازاقستانعا 226 ميلليون دوللاردان استام ينۆەستيتسيا سالدى. قازىر ەلىمىزدە يراننىڭ ىسكەرلىك قاۋىمداستىعى اشقان 350-دەن استام كاسىپورىن تابىستى جۇمىس ىستەپ جاتىر. بۇگىنگى باسقوسۋ وسىنداي كاسىپورىنداردىڭ قاتارىن كوبەيتۋگە سەپتىگىن تيگىزەدى دەپ سەنەمىز», دەدى قاسىم-جومارت توقاەۆ.