استانادا قولايسىز اۋا رايىنا بايلانىستى پوليتسيا دەپارتامەنتى قىزمەتىن كۇشەيتتى. ءتارتىپ ساقشىلارى قوعامدىق قاۋىپسىزدىكتى قامتاماسىز ەتۋ, جول-كولىك وقيعالارىنىڭ الدىن الۋ جانە ازاماتتارعا جەدەل كومەك كورسەتۋ جۇمىستارىن توقتاتپاي جۇرگىزەدى, دەپ حابارلايدى Egemen.kz.
ىشكى ىستەر مينيسترلىگىنىڭ مالىمەتىنشە, قالادا پاترۋلدىك جاساقتار سانى ارتتىرىلىپ, جول-پاترۋلدىك پوليتسيا تاۋلىك بويى باقىلاۋدى كۇشەيتتى.
«پوليتسەيلەر كوكتايعاق جولداردا قوزعالىستى رەتتەپ, قاتتى جەل سالدارىنان قيىندىققا تاپ بولعان كولىكتەرگە كومەك كورسەتىپ جاتىر. سونىمەن قاتار تۇرعىن ۇيلەر مەن الەۋمەتتىك نىسانداردىڭ اينالاسىندا قۇقىق بۇزۋشىلىقتاردىڭ الدىن الۋ رەيدتەرى دە جالعاسادى», دەلىنگەن حابارلامادا.
توتەنشە جاعدايدا قالعان ازاماتتارعا قولداۋ كورسەتىلىپ, قارلى بوران كەزىندە جولدا قالعان جۇرگىزۋشىلەر, باعىتىنان اداسقان جاياۋ جۇرگىنشىلەر جانە جەدەل كومەك قاجەت ادامدارعا جاردەم بەرىلەدى.
پوليتسيا دەپارتامەنتى قالا اكىمدىگى مەن كوممۋنالدىق قىزمەتتەرمەن بىرلەسىپ, جولداردىڭ تازالانۋى مەن قوعامدىق ءتارتىپتىڭ ساقتالۋىن ۇيلەستىردى.