الماتى قالاسىنىڭ مادەنيەت باسقارماسىنا قاراستى قازاق مەملەكەتتىك تسيركىنىڭ دارىندى جاس ونەرپازى, تسيرك اۋلەتىنىڭ جالعاستىرۋشىسى, ج.ەلەبەكوۆ اتىنداعى رەتسك ستۋدەنتى, 16 جاستاعى ءالي سالاۆاتوۆ رەسەيدىڭ تۋلا قالاسىندا «نا يازىكە ميرا» V حالىقارالىق بالالار مەن جاستار تسيرك ونەرى فەستيۆالىندە قولا جۇلدەگەر اتاندى, دەپ حابارلايدى Egemen.kz.
فەستيۆالگە جونگلەرلەر, اكروباتتار, سايقىمازاقتار, ەكۆيليبريستەر جانە تسيرك ونەرىنىڭ باسقا دا باعىتتارى بويىنشا كوپتەگەن ەلدەن 200-دەن استام دارىندى قاتىسۋشىلار جينالدى.
الماتى قالاسى اكىمدىگىنىڭ مالىمەتىنشە, ءالي سالاۆاتوۆتىڭ «ەدەنگە سوقپالى دوپتارمەن جونگليورلىك ونەر» اتتى كوركەم ءنومىرى قازىلار القاسى مەن كورەرمەندەردى ەرەكشە شەبەرلىگىمەن, ورىنداۋ دالدىگىمەن جانە جارقىن ەنەرگياسىمەن باۋراپ الدى.
«مەن ءۇشىن بۇل جەڭىس – جاڭا مۇمكىندىكتەرگە جول اشقان ەرەكشە ءسات. قولداعان ۇستازدارىما, ۇيىمداستىرۋشىلارعا جانە جانكۇيەرلەرگە شىن جۇرەكتەن العىس ايتامىن. الداعى ۋاقىتتا بۇدان دا بيىك اسۋلاردى باعىندىرۋعا ۇمتىلامىن», دەيدى جاس ءارتىس.