كەشە ورتالىق كوممۋنيكاتسيا قىزمەتىندە «سامۇرىق-قازىنا» ۇاق» اق باسقارما توراعاسى ومىرزاق شوكەەۆ ءباسپاسوز ءماسليحاتىن وتكىزدى. ول ۇكىمەتتىڭ كەڭەيتىلگەن وتىرىسىندا جۇكتەلگەن تاپسىرمالاردىڭ ورىندالۋى مەن «نۇرلى جول» باعدارلاماسىنىڭ جۇزەگە اسىرىلۋى تۋرالى, سونداي-اق قوردىڭ كومپانيالار توبىنىڭ جەتىستىكتەرى جونىندە ايتتى.
سوڭعى جىلداعى قيىندىقتارعا قاراماي, ۇلتتىق ءال-اۋقات قورى العا قويعان مىندەتتەردى ەڭسەرىپ كەلە جاتقانىن جەتكىزگەن قوعام توراعاسى وتكەن جىلدىڭ تابىستارىن تىزبەكتەدى. «بىلتىر داعدارىس باستالعان جىل بولعانىنا قاراماستان, «سامۇرىق-قازىنانىڭ» تازا تابىسى 458 ملرد. تەڭگەنى قۇرادى. بۇل رەتتە قورعا قاراستى كومپانيالار تيىمدىلىگىنىڭ باستى ولشەمى سانالاتىن وپەراتسيالىق تابىستىڭ كورسەتكىشى 19,52 پايىز بولدى. جالپى الىپ قارايتىن بولساق, قورعا قاراستى كومپانيالار بىلتىرعى جىلى جالپى قۇنى 2 ملرد. 900 ملن. دوللارعا جەتكەن 13 جوبانى ناتيجەلى اياقتادى. مۇنىمەن قوسا, جوبالاردىڭ جۇزەگە اسىرىلۋىنىڭ ارقاسىندا 5 مىڭ 600 ۋاقىتشا, ال 1 مىڭ 200 تۇراقتى جۇمىس ورنى اشىلدى», دەدى ءو.شوكەەۆ.
ۇلتتىق قور اقشا ۇنەمدەۋ ماقساتىمەن, وزىنە قاراستى كومپانيالار توبىنىڭ بيىلعا ارنالعان شىعىستارىن 337 ملرد. تەڭگەگە قىسقارتىپ, وڭتايلاندىرىپتى. ناقتى ساندارعا جۇگىنسەك, اكىمشىلىك شىعىستار 64 ملرد. تەڭگەنى, ال كۇردەلى شىعىستار 240 ملرد. تەڭگەنى قۇرايدى ەكەن. قور باسشىسىنىڭ ايتقانىنا قاراعاندا, قىسقارتۋ جۇمىسى مەيلىنشە كۇردەلى بولىپ تابىلاتىن ۇلكەن كومپانيالاردا ءبىرتالاي شارالار اتقارىلىپتى. ماسەلەن, «قازمۇنايگاز» ۇلتتىق كومپانياسىنىڭ مەنەدجمەنتتىك شىعىستارى اعىمداعى جىلى 134 ملرد. تەڭگەگە ورتايسا, «قازاقستان تەمىر جولى» ۇك» اق بيۋدجەتى 84 ملرد. تەڭگەگە قىسقارتىلماق كورىنەدى. «قاراجاتتى وسىنشاما قىسقارتا وتىرىپ, جۇمىس ناتيجەسىن ساقتاۋ اسا كۇردەلى شارۋا. دەگەنمەن, اعىمداعى شىعىستار بويىنشا ءوندىرىستەگى قىزمەتكەرلەردىڭ جالاقىسى ساقتالادى, بيۋدجەتكە مىندەتتى سالىقتار دا تولەنەدى, وزگە دە الەۋمەتتىك قولداۋلار سەكىلدى باپتار ءوز قالپىندا قالدىرىلادى», دەدى توراعا.
قازىرگى تاڭدا «سامۇرىق-قازىناعا» قاراستى كومپانيالاردىڭ, سونىڭ ىشىندە ۇيىمدىق قۇرىلىمداردىڭ بارلىعىندا تەرەڭدەتىلگەن كۇردەلى قايتا قۇرۋ جۇمىستارى ءجۇرىپ جاتىر ەكەن. ناقتىلاساق, كومپانيالار توبى بويىنشا بيزنەس ۇدەرىستەرى جاڭا ۇلگىگە كوشىرىلۋدە. جۇمىسقا جالداۋ, تەستىلەۋ, كادرلاردى كوتەرمەلەۋ, قىزمەتكەرلەردى جۇمىستان بوساتۋدىڭ بارلىق تەتىك-ەرەجەلەرى قايتا پىسىقتالۋدا. مۇنداعى ءماسەلە, اكىمشىلىك-باسقارۋ پەرسونالدارىنا قاتىستى بولىپ وتىر. باسقارۋشىلىقتان بولەك, وندىرىستىك تەحنولوگيالار دا قايتا تاپتىشتەلەدى. سونداي-اق, قور اياسىنداعى ترانسفورماتسياعا قاتىستى جۇمىستار ەنشىلەس كومپانيالاردا جۇرگىزىلۋدە ەكەن.
اتالعان شاراعا وراي «قازمۇنايگاز», «قازپوشتا», «قازاقستان تەمىر جولى», «قازاتومونەركاسىپ», «سامۇرىق-ەنەرگو» سەكىلدى كومپانيالاردىڭ مەنەدجمەنتى بەلسەندى جۇمىسقا كىرىسىپ تە كەتىپتى. شامامەن كومپانيالاردىڭ 750 قىزمەتكەرى جاڭعىرتۋ كومانداسىنا شوعىرلانعان. ماسەلەن, قتج جاڭا كورپوراتيۆتىك مادەنيەتتى ەنگىزۋ دەڭگەيىنەن وتۋدە. ال «قازپوشتا» اق ءوز قىزمەتتەرىنىڭ ساپاسىن ارتتىرىپ, باسەكەگە قابىلەتسىزدىك سەبەپتەرىن ايقىنداۋمەن اينالىسىپ جاتقان كورىنەدى. «ترانسفورماتسيا اياسىندا «قازاتومونەركاسىپ» ءوزىنىڭ ستراتەگيالىق باسىمدىقتارىنا ءجىتى ءمان بەرە باستادى. بۇل كومپانيانىڭ الداعى ماقساتى الەم نارىعىندا باعا قالىپتاستىرۋ قىزمەتىن تۇتىنۋشى ەمەس, كەرىسىنشە, الەمدىك نارىقتاعى باعانى قالىپتاستىرۋشى بولۋى كەرەك. بۇعان كومپانيانىڭ مۇمكىندىكتەرى جەتەدى», دەدى ءو.شوكەەۆ.
وسى كەزەڭدە جەتى ءىرى كومپانيادا وپەراتسيالىق ترانسفورماتسيا جۇمىستارى جۇزەگە اسىرىلۋدا. بارلىق كومپانيالار بويىنشا شامامەن 40-قا جۋىق بيزنەس ۇدەرىسى اياسىندا مۇقيات تالداۋ جۇمىستارى ءجۇرگىزىلگەن سوڭ, جاڭا نەگىزگى كورسەتكىشتەر ايقىندالماق كورىنەدى. «ترانسفورماتسيا توڭىرەگىندەگى رەفورمانىڭ تيىمدىلىگىنە كەلسەك, تەك ءبىر عانا «قازاقستان تەمىر جولى» كومپانياسىنىڭ ءوزى جىل سايىن 20 ملرد. تەڭگەنىڭ تيىمدىلىگىن سەزىنەتىن بولادى. سالىستىرمالى تۇردە الساق, قتج-نىڭ بىلتىرعى تازا تابىسى 27,3 ملرد. تەڭگەنى قۇرادى. ال ءبىز وسى باعدارلامانىڭ ارقاسىندا ول كورسەتكىشتى ەكى ەسەگە جۋىق ارتتىرا الامىز», دەدى باسقارما توراعاسى.
نۇرباي ەلمۇراتوۆ,
«ەگەمەن قازاقستان».