كەشە جوعارعى سوت توراعاسى قايرات ءمامي اتىراۋعا ارنايى كەلىپ, ەلباسى جارلىعىمەن وبلىستىق سوتتىڭ توراعاسى بولىپ تاعايىندالعان مارعۇلان بەكتۇرعانوۆتى ۇجىمعا تانىستىردى.
– مارعۇلان جۇبانىش ۇلى – كاسىبي سۋديا, ءارى تاجىريبەلى باسشى. اۋداندىق سوتتىڭ توراعاسى, وبلىستىق سوت القاسىنىڭ توراعاسى قىزمەتتەرىن اتقاردى. مۇنىڭ الدىندا جامبىل وبلىستىق سوتىنىڭ توراعاسى لاۋازىمىندا بولدى. سوت جۇيەسىندەگى قىزمەتتىك ءوتىلى 17 جىلدان اسادى, –دەي كەلە جوعارعى سوت توراعاسى قايرات ءمامي ونىڭ جامبىل وبلىستىق سوتىنىڭ جۇمىسىن وبلىستىق سوتتار رەيتىنگىندە ءۇشىنشى ورىنعا كوتەرگەنىنە توقتالدى. ەندى اتىراۋ وبلىستىق سوتىن باسقارۋدا دا وسىنداي تابىسقا جەتۋىنە سەنىم ءبىلدىردى. ال بۇرىنعى توراعا مۇحتار سماعۇلوۆتىڭ پاۆلودار وبلىستىق سوتىنا باسشىلىق جاسايتىنىن حابارلادى.
سونىمەن بىرگە, سۋديالار الدىندا تۇرعان مىندەتتەردى سارالاپ, كەمشىلىكتەرگە كەڭدىك جاسالمايتىنىن جەتكىزدى. ماسەلەن, وتكەن جىلى اتىراۋ وبلىسىنداعى اۋداندىق سوتتاردىڭ 9 ءىسى بۇزىلعان. ءۇش سۋديا تارتىپتىك جاۋاپكەرشىلىككە تارتىلىپتى. اتىراۋ وبلىسىنان جوعارعى سوتقا تۇسەتىن شاعىمداردىڭ 82 پايىزى ەكونوميكالىق سوتتىڭ توراعاسى مەن سۋديالارىنا قاتىستى بولعان. ءتىپتى, زاڭدا كوزدەلمەگەن سانكتسيا سالۋ دا ورىن العان. «الداعى ۋاقىتتا مۇنداي كەمشىلىكتەر ورىن الماۋى ءتيىس», دەدى قايرات ءمامي.
جولداسبەك شوپەعۇل,
«ەگەمەن قازاقستان».
اتىراۋ وبلىسى.