وسى جىلدىڭ جازىندا قوستاناي قالاسىنىڭ تۇرعىنى كونسۋلتاتيۆتىك-دياگنوستيكالىق جانە دەرماتوكوسمەتولوگيالىق قىزمەت ءۇشىن سالونعا 1,2 ملن تەڭگە تولەگەن. الايدا ۋادە ەتىلگەن ناتيجەنى كورمەگەندىكتەن كەلىسىمدى بۇزىپ, سالوننان اقشانى قايتارۋدى تالاپ ەتكەن. سالون تۇتىنۋشىنىڭ تالابىن ەسكەرۋسىز قالدىرعاننان كەيىن, قوستانايلىق تۇرعىن تۇتىنۋشىلار قۇقىعىن قورعاۋ جانە ساۋدا دەپارتامەنتىنە جۇگىنگەن, دەپ جازادى Egemen.kz.
دەپارتامەنت تەكسەرۋ بارىسىندا سالوننىڭ وتىنىشكە جاۋاپ بەرمەگەنىن انىقتاپ, اكىمشىلىك جاۋاپكەرشىلىككە تارتتى. سونىمەن قاتار كەلىسىمشارتقا تۇتىنۋشىلاردىڭ قۇقىعىن شەكتەيتىن شارتتاردى, ونىڭ ىشىندە اقشانى قايتارماۋ تۋرالى ەرەجەنى الىپ تاستاۋ جونىندە نۇسقاما بەرىلدى. ال تۇتىنۋشىعا سوتقا جۇگىنۋ ۇسىنىلعان.
سوت بارىسىندا سالوننىڭ دەرماتوكوسمەتولوگيالىق پروتسەدۋرالاردى ليتسەنزياسىز جاساعانى انىقتالدى. سەبەبى بۇل جۇمىس مەديتسينالىق قىزمەتتەر قاتارىندا بولعان. سوت سالوندى تۇتىنۋشىعا بارلىق تولەنگەن سومانى قايتارۋعا مىندەتتەدى.
«بۇل جاعداي كاسىپكەردىڭ زاڭ تالاپتارىن ورىنداۋى مىندەتتى ەكەنىن, ال تۇتىنۋشى ساپالى ءارى قاۋىپسىز قىزمەت الۋ قۇقىعىنا يە ەكەنىن تاعى ءبىر رەت كورسەتتى. دەپارتامەنت ءوڭىر تۇرعىندارىنىڭ قۇقىقتارىن تۇراقتى قورعاپ, باقىلاۋدى كۇشەيتەدى», دەدى كوستاناي وبلىسى بويىنشا ساۋدا جانە تۇتىنۋشىلار قۇقىعىن قورعاۋ دەپارتامەنتى باسشىسىنىڭ مىندەتىن اتقارۋشى ك. اكيجانوۆ.
بيىل دەپارتامەنتكە 717 – جازباشا, Telegram-بوتقا – 106, «جىلدام جەلىگە» تەلەفون ارقىلى – 269 ءوتىنىش تۇسكەن. تاعى 360 ازامات جەكە قابىلداۋدا مامانداردان كەڭەس العان. تۇتىنۋشىلارعا دەپارتامەنتتىڭ ارالاسۋىمەن جالپى كولەمى 62,7 ملن تەڭگەدەن استام قاراجات قايتارىلعان.سونداي-اق مەملەكەتتىك باقىلاۋ اياسىندا 73 تەكسەرۋ جۇرگىزىلگەن. جوسپاردان تىس تەكسەرۋلەر ناتيجەسىندە 16 كاسىپكەرگە ەسكەرتۋ بەرىلىپ, 44 كاسىپكەرگە جالپى سوماسى 1 397 000 تەڭگە ايىپپۇل سالىنعان.