اتالعان وبلىسقا قاراستى الاكول اۋدانى پروكۋراتۋراسى مەكتەپتەر مەن مەملەكەتتىك بالاباقشالاردا قاۋىپتى قالدىقتاردى پايدالانۋ, ساقتاۋ جانە كادەگە جاراتۋ كەزىندە زاڭناما تالاپتارىنىڭ ساقتالۋىنا تالداۋ جۇرگىزدى, دەپ حابارلايدى Egemen.kz.
تالداۋ بارىسىندا ىستەن شىققان 436 سىناپتى لامپا ۇزاق ۋاقىت قويمالاردا جانە جەرتولەلەردە ساقتالعانى انىقتالدى. بۇل وقۋشىلار مەن قىزمەتكەرلەردىڭ دەنساۋلىعىنا تىكەلەي قاۋىپ ءتوندىردى.
سانيتارلىق قاعيدالارعا (دەنساۋلىق ساقتاۋ ءمينيسترىنىڭ 05.08.2021 ج. №76 بۇيرىعى) سايكەس, ىستەن شىققان سىناپتى لامپالار وقۋشىلار قول جەتكىزە المايتىن جەكە بولمەدە ساقتالۋى كەرەك, ولاردى قوقىس جاشىكتەرىنە تاستاۋعا جول بەرىلمەيدى.
وبلىس پروكۋراتۋراسىنىڭ مالىمەتىنشە, انىقتالعان زاڭبۇزۋشىلىقتار تولىعىمەن جويىلدى, قاۋىپتى قالدىقتار بەلگىلەنگەن تارتىپپەن شىعارىلدى. وسىلايشا, 3 458 ازاماتتىڭ, ونىڭ ىشىندە 2 947 وقۋشىنىڭ جانە 511 قىزمەتكەردىڭ قۇقىقتارى قورعالدى.