كەشە استانا قالاسىنىڭ اكىمدىگى جانە «سامۇرىق-قازىنا» ۇلتتىق ءال-اۋقات قورى» اكتسيونەرلىك قوعامى اراسىندا كاسىپقوي سپورتتى دامىتۋ سالاسىنداعى ءوزارا ىنتىماقتاستىق جونىندەگى مەموراندۋمعا قول قويۋ ءراسىمى بولىپ ءوتتى.
استانا قالاسىنىڭ اكىمى ءادىلبەك جاقسىبەكوۆ پەن «سامۇرىق-قازىنا» اق باسقارما توراعاسى ومىرزاق شوكەەۆ قول قويعان بۇل مەموراندۋم ءوزارا ىنتىماقتاستى جەتىلدىرۋدىڭ, اتاپ ايتقاندا, ەلباسىنىڭ قولداۋىمەن 2012 جىلدىڭ جەلتوقسانىندا قۇرىلعان «استانا» پرەزيدەنتتىك كاسىپقوي سپورت كلۋبىن دامىتۋ بويىنشا بىرلەسە جۇمىس ىستەۋدىڭ باسىم باعىتتارىن بەلگىلەدى. ەلباسى نۇرسۇلتان نازارباەۆ جاستاردىڭ سپورتپەن بارىنشا ەتەنە ارالاسۋىنا, ونىڭ ىشىندە جاستار اراسىندا كاسىپقوي سپورتتى دامىتۋعا بارىنشا قامقورلىق جاساپ كەلەدى.
– مەملەكەت باسشىسىنىڭ سالاماتتى ءومىر سالتىن قالىپتاستىرۋ, دەنەشىنىقتىرۋ جانە كاسىپقوي سپورت سالالارىنا قاتىستى تاپسىرمالارىن ورىنداۋ – ءبىزدىڭ ورتاق مىندەتىمىز. اكىمدىك پەن «استانا» سپورت كلۋبىنىڭ بىرلەسكەن ارەكەتى نەگىزىندە ءبىز دەنەشىنىقتىرۋمەن جۇيەلى تۇردە شۇعىلداناتىنداردىڭ سانىن ارتتىرىپ, ەلوردانىڭ سپورتتىق نىساندار جەلىسى مەن ساۋىقتىرۋ دەمالىس ينفراقۇرىلىمىن كەڭەيتۋىمىز قاجەت. اكىمدىك ءوز تاراپىنان دەنەشىنىقتىرۋ جانە سپورتتى دامىتۋ مەن ناسيحاتتاۋ بويىنشا كلۋبپەن كەز كەلگەن ۋاقىتتا ىنتىماقتاسۋعا دايىن, – دەدى قالا اكىمى.
ومىرزاق شوكەەۆتىڭ ايتۋى بويىنشا, استانا قالاسى اكىمدىگى مەن «سامۇرىق-قازىنا» اق-تىڭ كاسىپقوي سپورتتى دامىتۋ باعىتىنداعى بىرلەسكەن كەشەندى جۇمىس شارالارى بولاشاقتا قازاقستاندىق سپورتشىلاردىڭ حالىقارالىق سايىستاردا ءناتيجەلى جەڭىستەرگە جەتۋلەرىنە ءسوزسىز ىقپالىن تيگىزۋى ءتيىس.
قازىرگى ۋاقىتتا «استانا» پكسك قۇرامىنا وتاندىق ەڭ ۇزدىك سپورت كلۋبتارى – الەمگە ايگىلى كاسىپقوي ۆەلوكوماندا, باسكەتبول جانە فۋتبول كلۋبتارى, «بارىس» حوككەي كلۋبى, داكار جولدارىن باعىندىرعان «Astana motorsports» كومانداسى, «Astana Arlans» بوكسشىلارى, ات سايىس پەن سۋداعى پولو كوماندالارى جانە ۇلتتىق كۇرەستى دامىتۋعا ارنالعان بىرەگەي «قازاقستان بارىسى» جوباسى شوعىرلانعان. اۋىر اتلەتيكادان ەكى دۇركىن وليمپيادا, ءتورت دۇركىن الەم چەمپيونى يليا يلين جانە كونكيمەن مانەرلەپ سىرعاناۋدان وليمپيا ويىندارىنىڭ قولا جۇلدەگەرى, 2015 جىلعى ءتورت قۇرلىقتىڭ چەمپيونى دەنيس تەن ەسىمدەرى دە «استانا» برەندىمەن تورتكۇل دۇنيەگە تۇگەل تانىلدى. الداعى ۋاقىتتا «استانا» پكسك جاھاندىق سپورت الاڭدارىندا ەلىمىزدىڭ كوك بايراعىن اسقاق جەلبىرەتەتىن تالاي ساڭلاقتاردى تاربيەلەپ شىعاراتىنى ءسوزسىز.
جىلقىباي جاعىپار ۇلى,
«ەگەمەن قازاقستان».