كينولوگتار تازىنى قويانعا سالىپ, سىناپ كوردى

ءىس-شارانىڭ ۇيىمداستىرۋشىسى – قازاقستان كينولوگتار وداعى تەك كورمەلەر مەن بايقاۋلارمەن شەكتەلمەي, وزدەرىنىڭ شىنايى جۇمىس قاۋقارىن كورسەتۋ ءۇشىن 15 مىقتى تازى ىرىكتەپ العان.

بۇل سىناقتار قازاقى يت تۇقىمىن ساقتاۋ, مولايتۋ مەن اسىلداندىرۋ جانە ونىڭ حالىقارالىق دەڭگەيدە تانىلۋىن قامتاماسىز ەتۋگە باعىتتالعان كەشەندى جۇمىستىڭ بولىگى.

دالا جاعدايىنداعى باعالاۋ – فورمالدى ءراسىم ەمەس. جابايى اڭدى العان تازىنىڭ قابىلەتى ارقىلى تۇقىمنىڭ تاريحي اڭشىلىق قاسيەتتەرىن ساقتاپ, ونى ءارى قاراي اسىلداندىرۋ ماقساتىندا قولدانۋعا لايىقتىلىعى ايقىندالادى.

بۇل ءىس-شارا, بۇعان دەيىن استانا ماڭىندا جۇرگىزىلگەن سىناقتىڭ جالعاسى بولدى. استانادا يتتەر ورقويانعا سالىنسا, بۇل جولى تازىلار قۇمقويان اۋلادى, بۇل ءوز كەزەگىندە قۋ سيپاتىن تۇبەگەيلى وزگەرتەدى.

ورقويان كوبىنە جوعارى جىلدامدىقپەن ءتۇزۋ باعىتتا قاشسا, قۇمقويان جۇگىرىس باعىتىن ءجيى وزگەرتىپ, يتتەن جەدەل ارەكەت ەتۋدى تالاپ ەتەدى.

قازاقى تازى بويىنشا تاجىريبەلى مامانداردان قۇرالعان ساراپشىلىق كوميسسيا يتتەردى كەلەسى نەگىزگى كورسەتكىشتەر نەگىزىندە باعالادى:

جىلدامدىق پەن مانەۆر - تازىنىڭ قانشالىقتى تەز جانە قوياننىڭ سوڭىنان باعىتىن قانشالىقتى شاپشاڭ وزگەرتە الاتىنى;

ىزدەۋ جانە ءيىس سەزىمىن پايدالانۋ - تازىنىڭ اڭدى وزدىگىنەن تابۋ قابىلەتى, ءيىستى جانە جەلدى پايدالانۋى;

توزىمدىلىك - ءيتتىڭ ۇزاق ۋاقىت بويى جوعارى جۇمىس قارقىنىن ساقتاي الۋى;

ينتەللەكت جانە قۋ شەبەرلىگى - تازى قوياننىڭ قىلىعىن «وقي» ءبىلۋى جانە ونىڭ قاشۋ باعىتىن الدىن الا بولجاي الۋى.

قاتىسۋشىلاردىڭ دايىندىق دەڭگەيى جوعارى بولدى, جۇلدەلى ورىندار ءۇشىن كۇرەس تارتىستى ءوتتى. سىناق ناتيجەلەرى:

1-ورىن: ارەكەت, يەسى – «NOMAD» ۇلتتىق اڭشىلىق كلۋبى» قوعامدىق قورى;

2-ورىن: ادىرنا, يەسى - «NOMAD» ۇلتتىق اڭشىلىق كلۋبى» قوعامدىق قورى;

3-ورىن: قaبلان, يەسى – مۋپتەكەەۆ ەرنار.

قازاقستان كينولوگتار وداعى الداعى ۋاقىتتا مۇنداي سىناقتار قازاقى تازى بويىنشا دالالىق تەكسەرۋلەر مەن اسىلداندىرۋ جۇمىسىنىڭ بىرىڭعاي جۇيەسىنىڭ نەگىزىنە اينالاتىنىن اتاپ ءوتتى. وسىنداي ءىس-شارالاردى جۇيەلى تۇردە وتكىزۋ جانە ولاردى تازىنى اسىلداندىرۋ جۇمىسىنىڭ مىندەتتى تالابى قىلۋ جوسپارلانىپ وتىر.

باستاما ەلىمىزدىڭ تۇكپىر-تۇكپىرىندەگى اڭشىلار مەن تازى وسىرۋشىلەر تاراپىنان قولداۋ تاپتى.

ەگەر قازاقى تازىنى تەك فوتوسۋرەتتەر مەن اڭىزداردا عانا ەمەس, ناقتى جۇمىس ىستەيتىن اڭشىلىق يت رەتىندە ساقتاپ قالعىمىز كەلسە, دالالىق سىناقتار قالىپتى جانە تۇراقتى تاجىريبەگە اينالۋى ءتيىس.