ماڭعىستاۋدا جازۋشى, قوعام قايراتكەرى ءابىش كەكىلباي ۇلىنىڭ شىعارماشىلىعىن حالىقارالىق دەڭگەيدە ناسيحاتتاۋ جۇمىستارى قارقىندى جۇرگىزىلىپ جاتىر, دەپ جازادى Egemen.kz.
وسى باعىتتا تۇركيانىڭ استاناسى انكارادا العاش رەت قازاق جازۋشىسىنىڭ فيلوسوفيالىق پروزاسىن تۇرىك وقىرماندارىنا جاڭا قىرىنان تانىتاتىن ء«ابىش كەكىلباەۆتىڭ حيكاياتتار الەمى» اتتى عىلىمي-تانىمدىق ەڭبەك باسپادان شىقتى. بۇل تۋرالى قوعامدىق كوممۋنيكاتسيا ورتالىعىندا وتكەن بريفينگتە ش.ەسەنوۆ اتىنداعى كاسپي تەحنولوگيالار جانە ينجينيرينگ ۋنيۆەرسيتەتىنىڭ پروفەسسورى ادىلەت قابىلوۆ ايتتى.
سپيكەردىڭ ايتۋىنشا, كىتاپ اۆتورلارى - تۇركيالىق جانە قازاقستاندىق پروفەسسورلار ورحان سويلەمەز, ادىلەت قابىلوۆ جانە زەرتتەۋشى سەفا باشيموعلۋ.
– انكاراداعى Spica Works باسپاسىنان شىققان بۇل ەڭبەك ءابىش الەمىنىڭ كوركەمدىك, ەتيكالىق جانە مەتافيزيكالىق تەرەڭدىگىن تۇرىك ادەبيەتتانۋ داستۇرىمەن ساباقتاستىرا وتىرىپ تالداعان العاشقى ەڭبەكتەردىڭ ءبىرى سانالادى. ءا.كەكىلباي ۇلىنىڭ شىعارماشىلىق مۇراسى تۇركى تىلدەس رۋحاني كەڭىستىكتە دە جاڭاشا عىلىمي پايىممەن باعالانا باستادى, – دەدى ادىلەت قابىلوۆ.
بريفينگ بارىسىندا ۋنيۆەرسيتەت پروفەسسورى ناعبدۋ قاماروۆا ء«ابىشتانۋ» وقۋ قۇرالىنىڭ مازمۇنىنا توقتالدى.
– عىلىم جانە جوعارى ءبىلىم مينيسترلىگىنىڭ گرانتتىق جوباسى اياسىندا بيىل Yessenov ۋنيۆەرسيتەتىنىڭ پروفەسسور-وقىتۋشىلارى ادىلەت قابىلوۆ, ناعبدۋ قاماروۆا جانە باقتىباي جايلاۋدىڭ اۆتورلىعىمەن ء«ابىشتانۋ» وقۋ قۇرالى جارىق كوردى. ول ەڭبەگىمىز قازىردىڭ وزىندە «قازاق ءتىلى مەن ادەبيەتى» جانە «فيلولوگيا» ماماندىقتارىنا وقىتىلىپ كەلەدى. وقۋ قۇرالى ءابىش كەكىلباي ۇلىنىڭ پوەزيا, پروزا, دراماتۋرگيا, پۋبليتسيستيكا جانە اۋدارما سالالارىنداعى شىعارماشىلىعىن جۇيەلى تۇردە تالداپ, قالامگەر مۇراسىنىڭ يدەيالىق-كوركەمدىك جانە ادەبي-تەوريالىق ءمانىن اشىپ كورسەتەدى, – دەدى ناعبدۋ قاماروۆا.
نازارباەۆ ۋنيۆەرسيتەتىنىڭ وقىتۋشىسى مۇستافا شوقايدىڭ ايتۋىنشا, بيىل كولەمدى ۇجىمدىق عىلىمي ەڭبەك ء«ابىش كەكىلباي ۇلى شىعارماشىلىعى قوعامدىق سانانىڭ جاڭعىرۋى كونتەكسىندە» اتتى مونوگرافيا جازىلىپ, باسپادان شىقتى.
– بۇل مونوگرافيا - ءا.كەكىلباي ۇلى شىعارماشىلىعىن ۇلتتىق سانا مەن رۋحاني جاڭعىرۋ يدەيالارى تۇرعىسىنان جاڭا عىلىمي دەڭگەيدە پايىمداپ, قالامگەر مۇراسىنىڭ كوركەمدىك-فيلوسوفيالىق جۇيەسىن كەشەندى تۇردە تالداعان تۇڭعىش اكادەميالىق زەرتتەۋ. مونوگرافيانىڭ اۆتورلارى - پروفەسسورلار ادىلەت قابىلوۆ, ناعبدۋ قاماروۆا, ورحان سويلەمەز جانە PhD دوكتور مۇستافا شوقاي. كەشەندى ەڭبەك ستۋدەنتتەر مەن ماگيسترانتتارعا عانا ەمەس, كەڭ اۋقىمدى وقىرمان قاۋىمعا ارنالعان. اتالعان ەڭبەك انكاراداعى Spica Works باسپاسىنان شىقتى, – دەدى مۇستافا شوقاي.
ماڭعىستاۋ وبلىسى