«وتباسى بانك» استانا قالاسى مەملەكەتتىك كىرىستەر دەپارتامەنتىنەن ماراپات الدى. نۇرا اۋدانى بويىنشا «ۇزدىك سالىق تولەۋشى» نوميناتسياسىنا يە بولدى جانە قالانىڭ بيۋدجەتىن تولىقتىرۋعا قوسقان ۇلەسى ءۇشىن ماراپاتتالدى. بۇل – بانكتىڭ ۇستاپ وتىرعان اشىق ءارى ادال سالىق ساياساتىنىڭ جوعارى باعالانۋى, دەپ جازادى Egemen.kz.
2024 جىلى بانك 34,5 ملرد تەڭگە سالىق تولەدى.
2025 جىلدىڭ 11 ايىندا بۇل كورسەتكىش 42 ملرد تەڭگەگە جەتتى. ونىڭ 35,3 ملرد تەڭگەسى رەسپۋبليكالىق بيۋدجەتكە باعىتتالدى. رەسپۋبليكالىق بيۋدجەت – ەلدىڭ جالپى قورى, ياعني وسى قاراجات ەسەبىنەن اسكەر مەن پوليتسيانىڭ جۇمىسى, مەديتسينا, جول قۇرىلىسى, زەينەتاقىلار مەن مەملەكەتتىك باعدارلامالاردى قارجىلاندىرىلادى.
تاعى 2,98 ملرد تەڭگەنى بانك جەرگىلىكتى بيۋدجەتتەرگە اۋداردى. 2025 جىلعى 2 شىلدەگە دەيىن «وتباسى بانك» الماتى قالاسىنىڭ سالىق تولەۋشىسى بولدى. ودان كەيىن رەسمي تۇردە استانانىڭ سالىق تولەۋشىسىنە اينالدى. ەندى بانك تولەيتىن سالىقتارىنىڭ ءبىر بولىگى استانادا قالادى. سالىق قالا تۇرعىندارىنا قاجەتتى سالالار, ياعني: مەكتەپتەر مەن بالاباقشالاردىڭ جۇمىسى, ەمحانالار, كوشەلەر مەن اۋلالاردى جوندەۋ, قوعامدىق كولىك سىندى باعىتتارعا كەتەدى.
بيىل «وتباسى بانك» زەينەتاقى جارنالارى, ءمامس جانە باسقا دا الەۋمەتتىك تولەمدەرگە 3,65 ملرد تەڭگە باعىتتادى. 2025 جىلدىڭ قورىتىندىسى بويىنشا بانك 51,7 ملرد تەڭگە سالىق پەن الەۋمەتتىك تولەمدەر اۋدارۋدى جوسپارلاپ وتىر – بۇل وتكەن جىلمەن سالىستىرعاندا 17,2 ملرد تەڭگەگە ارتىپ رەكوردتىق كورسەتكىش بولماق.
– 2025 جىل «وتباسى بانك» ءۇشىن ەرەكشە جىل بولدى. ءبىز 600 ادامدىق كوماندامەن استاناعا كوشتىك. بانكتىڭ العاشقى ماراپاتى – ەلورداداعى ءىرى سالىق تولەۋشى رەتىندە تانىلۋىمىز – ءبىز ءۇشىن ۇلكەن مانگە يە. جاڭا استانالىقتار رەتىندە جەرگىلىكتى بيۋدجەتكە تۇسەتىن قارجىنى ارتتىرۋ ءۇشىن بار كۇشىمىزدى سالامىز. اسىرەسە, جاس ارىپتەستەرىمىز ەرەكشە ىنتامەن كوشتى, سەبەبى ولار وسى قالادا وتباسىن قۇرىپ, باسپانا ماسەلەسىن شەشەمىز دەپ ۇمىتتەنەدى, – دەدى «وتباسى بانك» باسقارما ءتورايىمى ءلاززات يبراگيموۆا.
«وتباسى بانكىندە» ەلوردا جاستارىنا قولجەتىمدى شارتتارمەن باسپانا الۋعا كومەكتەسەتىن ءتيىمدى قۇرال بار. ول – «ەلوردا جاستارى» باعدارلاماسى. استانادا بۇل باعدارلاما 2021 جىلدان بەرى جەرگىلىكتى اكىمدىكتىڭ قولداۋىمەن جۇمىس ىستەيدى.
وسى ۋاقىت ىشىندە باعدارلامانى ىسكە اسىرۋعا 23,5 ملرد تەڭگە ءبولىندى, ونىڭ نەگىزگى بولىگى – 20,4 ملرد تەڭگە قالا اكىمدىگى تاراپىنان باعىتتالدى. «ەلوردا جاستارى» باعدارلاماسىنىڭ ارقاسىندا 960 ادام جاڭا باسپاناعا يە بولدى. باعدارلاما بويىنشا باستاپقى جارنا نەبارى 10%, ال نەسيە مولشەرلەمەسى – جىلىنا 5%. جتسم 5,2%-دان 5,7%-عا دەيىن.