جاڭا سۋ كودەكسىندە ەلىمىزدەگى سۋ كوزدەرىن قورعاۋدىڭ ناقتى تەتىكتەرى ەنگىزىلدى. بۇرىنعى رەداكتسيادا سۋ قارجىلاي تابىس كوزى رەتىندە عانا قاراستىرىلسا, ەندى ول ەكوجۇيەنىڭ اسا ماڭىزدى بولىگى رەتىندە ايقىندالىپ وتىر, دەپ جازادى Egemen.kz.
جاڭا سۋ كودەكسىنىڭ 79-بابىنا ساي تۇيىق بوگەتتەردىڭ قۇرىلىسىنا تولىق تىيىم سالىندى. ەندى شاعىن وزەندەردە سۋ وتكىزۋ مۇمكىندىگى قاراستىرىلماسا بوگەت تۇرعىزۋعا بولمايدى.
بۇل نەلىكتەن ماڭىزدى؟سەبەبى تۇيىق بوگەتتەر سۋ اعىسىن توقتاتىپ, وزەن ارناسىنىڭ بىتەلۋىنە, تايىزدانۋىنا جانە قۇرعاپ كەتۋىنە اكەلەدى.جاڭا تالاپقا سايكەس تۇيىق بوگەتتەر قايتا جاڭارتىلۋى كەرەك نە تولىق بۇزىلۋى ءتيىس. ال وزەن ارنالارى قالپىنا كەلتىرىلۋى قاجەت.
جاڭا رەداكتسيادا «ەكولوگيالىق اعىن» ۇعىمى ەنگىزىلدى. ەندى ءار وزەندە قاجەتتى سۋ كولەمى مىندەتتى تۇردە ساقتالۋى كەرەك. تالاپقا ساي مۇنداي كورسەتكىش بەكىتىلگەن وزەندەردەن سۋدى الۋعا تىيىم سالىنادى.
بۇل شارا وزەندەر سۋىنىڭ تارتىلىپ, قۇرعاپ كەتۋىنىڭ الدىن الادى. سونداي-اق ەكولوگيالىق اعىن بالىقتاردىڭ تىرشىلىگىن, وزەن بويىنداعى ەكوجۇيەنىڭ تۇراقتىلىعىن ساقتاپ, وسىمدىكتەردى قورعاۋ ءۇشىن قاجەت.
كودەكستىڭ 29-بابىنا ساي وزەندەردە قانشا سۋ قالۋى كەرەك ەكەنىن سۋ رەسۋرستارى جانە يرريگاتسيا مينيسترلىگى جانىنداعى اقپاراتتىق-تالداۋ ورتالىعى بەلگىلەيدى.
سۋ قورعاۋ ايماقتارى مەن بەلدەۋلەرىن ساقتاۋ جۇيەسىنە دە وزگەرىس ەنگىزىلدى.
ەسكى كودەكستە سۋ قورعاۋ ايماقتارى تۋرالى نورمالار بولعانىمەن ولاردى ىسكە اسىرۋ تەتىكتەرى ناقتى قاراستىرىلماعان ەدى. جاڭا كودەكس بويىنشا اكىمدىكتەر ەكى جىل ىشىندە بارلىق ەلدى مەكەندە سۋدى قورعاۋ ايماقتارى مەن بەلدەۋلەرىن بەلگىلەۋى ءتيىس. شاعىن وزەندەر, كولدەر, باتپاقتى ايماقتار مەن مۇزدىقتاردى قورعاۋ شارالارى دا كۇشەيتىلدى.
كليماتتىڭ وزگەرۋىنە بەيىمدەلۋ جانە تاسقىن سۋدى جيناۋ دا نازارعا الىنعان.
ەسكى كودەكس مازمۇنىندا ناقتى شارالار جەتكىلىكسىز دەڭگەيدە كورسەتىلگەن ەدى. جاڭا كودەكستە بۇل ماسەلەگە قاتىستى جەكە تاراۋ ارنالىپ, وزەن ارنالارىن تازارتۋ جانە تەرەڭدەتۋ, تاسقىن جانە ەرىگەن قار سۋىن جينايتىن قويمالار سالۋ كوزدەلگەن. جينالعان سۋدى قۇرعاقشىلىق كەزىندە پايدالانۋ ءۇشىن سۋدى ارنايى رۇقساتسىز بىراق ناقتى تالاپتارعا سايكەس جيناۋعا مۇمكىندىك بەرەتىن نورمالار ەنگىزىلگەن.
وتكەن جىلى وزەندەر مەن كولدەردى قالپىنا كەلتىرۋ جونىندەگى جول كارتاسى بەكىتىلگەن. 2027 جىلعا دەيىن قازاقستاننىڭ 10 وڭىرىندە 51 وزەن مەن 1 كولدىڭ جالپى ۇزىندىعى 815 شاقىرىم بولاتىن ۋچاسكەلەرىن تازالاۋ جوسپارلانىپ وتىر.