بۇۇ ميسسياسى قۇرامىندا قىزمەت ەتەتىن ءبولىنۋدى باقىلاۋ جونىندەگى قازاقستان كونتينگەنتىنىڭ ينجەنەرلىك-ساپەرلىك توبى وسى جىلدىڭ 8 ايىندا بىتىمگەرلەر 32 جەدەل تاپسىرمانى ورىنداپ, 1 000-نان استام قاۋىپتى زاتتى, ونىڭ ىشىندە 23 قولدان جاسالعان قۇرىلعىنى تاۋىپ, جويعان, دەپ حابارلايدى Egemen.kz.
بۇعان دەيىن الدىڭعى روتاتسيا جۇمىسىندا 14 جەدەل تاپسىرمانى ورىنداۋ بارىسىندا ساپەرلەر 500-دەن استام قاۋىپتى زاتتى جانە 6 قولدان جاسالعان قۇرىلعىنى جويعان. ياعني كورسەتكىش 2 ەسە ارتقان.
ينجەنەرلىك-ساپەرلىك توپ كومانديرى مايور ەرنار امانتاي ۇلىنىڭ ايتۋىنشا, جارىلماعان وق-دارىلەردىڭ كوبى ەلدى مەكەندەر ماڭىنان تابىلعاندىقتان بەيبىت تۇرعىنداردىڭ ءومىرى مەن دەنساۋلىعىنا زور قاۋىپ توندىرەتىنى انىق.
«قاۋىپتى زاتتاردىڭ ورنالاسقان جەرى تۋرالى اقپارات بۇۇ قىزمەتكەرلەرىنەن, پاترۋل قۇرامىنان جانە كەيدە جەرگىلىكتى تۇرعىنداردان كەلىپ تۇسەدى. حابار تۇسكەن سوڭ وقيعا ورنىنا شىعىپ, باقىلاۋ جاساپ, زاتتاردى جويۋ كەزىندە تۋىندايتىن ىقتيمال قاۋىپتەردى باعالايمىز. بارلىق ءىس-قيمىل ينفراقۇرىلىمعا زيان كەلتىرمەۋ ماقساتىندا جۇرگىزىلەدى», دەدى ە.امانتاي ۇلى.
قورعانىس مينيسترلىگىنىڭ مالىمەتىنشە, ساپەرلەرگە كوبىنە ارتيللەريالىق جانە تانك سناريادتارىمەن, تانكىگە جانە جاياۋ اسكەرگە قارسى مينالارمەن, درونداردىڭ وقتۇمسىقتارىمەن, سونداي-اق قولدان جاسالعان جارىلعىش قۇرىلعىلارمەن جۇمىس ىستەۋگە تۋرا كەلەدى ەكەن. بۇل زاتتاردىڭ بارلىعى سيريا اۋماعىنداعى قارۋلى قاقتىعىستاردىڭ سالدارى, ال ميسسيانىڭ جاۋاپكەرشىلىك اۋماعىندا ولاردىڭ سانى ءالى دە جەتىپ ارتىلادى.
دەگەنمەن, وتاندىق كونتينگەنتتىڭ كاسىبي جۇمىسى بەيبىت تۇرعىندارعا تونەتىن قاۋىپ دەڭگەيىن ايتارلىقتاي تومەندەتىپ, بۇۇ جاۋاپكەرشىلىك ايماعىندا قاۋىپسىزدىكتى نىعايتۋعا ىقپال ەتىپ كەلەدى.