پاۆلوداردا كەيبىر كاسىپورىندار قورشاعان ورتانى لاستاۋ ءليميتىن اسىرىپ جىبەرگەن

كاسىپكەرلىك سۋبەكتىلەرى جىبەرەتىن نەگىزگى ءارى ەلەۋلى قۇقىقبۇزۋشىلىقتاردىڭ ءبىرى – ەميسسيالاردىڭ بەلگىلەنگەن ليميتتەردەن اسىپ كەتۋى. مىسالى, بيىل اقسۋ قالاسىنداعى اقسۋ فەرروقورىتپا زاۋىتى بەلگىلەنگەن نورمادان تىس شىعارىندىلارى ءۇشىن 855 ملن تەڭگە ايىپپۇل تولەگەن.

«سوڭعى ەكى جىلدا پاۆلودار وبلىسىندا ونەركاسىپتىك قالدىقتاردى كومۋگە قاتىستى ەكولوگيالىق زاڭنامانى بۇزۋدىڭ بىرنەشە جاعدايى تىركەلدى. مۇنداي قۇقىقبۇزۋشىلىقتار ءجيى كەزدەسپەيدى. دەيتۇرعانمەن اتالعان قىزمەت تۇرىمەن اينالىساتىن بيزنەس سۋبەكتىلەرىنىڭ ماسەلەسى قوعامدا كەڭىنەن تالقىلانىپ كەلەدى», دەپ حابارلادى وڭىرلىك مامانداندىرىلعان تابيعات قورعاۋ پروكۋراتۋراسىنان.

2024 جىلى مەملەكەتتىك ورگاندار تابيعات قورعاۋ زاڭناماسىن بۇزۋدىڭ 995 جاعدايىن انىقتاپ, ولاردىڭ ناتيجەلەرى بويىنشا اكىمشىلىك قۇقىقبۇزۋشىلىق تۋرالى ىستەر قارالعان. جالپى سوماسى 59 ملن تەڭگە ايىپپۇل وندىرىلگەن. ال بيىل مۇنداي سيپاتتاعى زاڭ بۇزۋشىلىقتاردىڭ جيىلەپ كەتكەنى بايقالىپ وتىر. جىل باسىنان 1 015 قۇقىقبۇزۋشىلىق تىركەلىپ, 891 ملن تەڭگەگە ايىپپۇلدار سالىنعان.

تابيعات قورعاۋ پروكۋرورلارى سالاداعى ءتيىستى زاڭنامانى بۇزۋدىڭ ەڭ كەڭ تارالعان تۇرلەرى – اڭ اۋلاۋ جانە بالىق اۋلاۋ قاعيدالارىن بۇزۋ ەكەنىن ايتادى. مىسالى, بيىل 1 015 قۇقىقبۇزۋشىلىقتىڭ 612 جاعدايى اڭشىلىق پەن بالىق اۋلاۋعا قاتىستى.

2024-2025 جىلدار ارالىعىندا شەتەلدىك كومپانيالار تاراپىنان تابيعات قورعاۋ زاڭناماسىن بۇزۋ جاعدايلارى تىركەلگەن جوق.

پاۆلودار وبلىسى