اسسامبلەيا جىلىنىڭ مەرەيلى سالتاناتى كۇن ساناپ شارىقتاي تۇسۋدە. ەلباسى, قازاقستان حالقى اسسامبلەياسىنىڭ توراعاسى نۇرسۇلتان نازارباەۆتىڭ قاتىسۋىمەن اشىلعان «قوعامدىق كەلىسىم» سارايى تاعى ءبىر يگى شارانىڭ شىمىلدىعىن اشتى. مۇندا «اسسامبلەيا – بىرلىك تۇتقاسى» مەگا-جوباسى باستاۋ الىپ, «دوستىق كىتابىن» مەكەمەلەر مەن كاسىپورىن ۇجىمدارىنا تاپسىرۋ شاراسى وتكىزىلدى.
– مەملەكەت باسشىسىنىڭ باستاماسىمەن قۇرىلعان قازاقستان حالقى اسسامبلەياسى ەلىمىزدەگى دوستىق, باۋىرمالدىق پەن تۇسىنىستىك قاعيدالارى ءبىزدىڭ ماڭگىلىك قۇندىلىعىمىز ەكەندىگىن بۇكىل الەمگە پاش ەتتى, – دەدى سالتاناتقا قاتىسۋشىلاردى قۇتتىقتاۋىندا اقمولا وبلىستىق قازاقستان حالقى اسسامبلەياسى توراعاسىنىڭ ورىنباسارى مارزيات توحاەۆا. – «دوستىق كىتابى» ەستافەتاسى 2013 جىلدان قولعا الىنىپ, بۇگىنگە دەيىن جالپى ءبىلىم بەرەتىن مەكتەپتەردەگى, ودان كەيىن كوللەدجدەر مەن جوعارى وقۋ ورىندارىنداعى يگى شارالارعا ەكپىن بەردى. ەركىن پىكىر الاڭىنا اينالعان بۇل جوبا ەندى ەڭبەك ۇجىمدارىنداعى جاقسى ىستەردىڭ جارشىسى بولاتىندىعىنا سەنەمىز.
كوكشەتاۋ قالاسىنداعى بارلىق ۇلتتىق-مادەني ورتالىقتاردىڭ, وقۋ ورىندارى مەن مەكەمەلەردىڭ وكىلدەرى قاتىسقان جيىندا قازاقستان حالقى اسسامبلەياسىنىڭ مۇشەلەرى مەيرامبەك كيىكوۆ پەن ەلەنا ماششينسكايا وبلىس اكىمى سەرگەي كۋلاگينمەن بىرگە استانا قالاسىندا, اسسامبلەيا جىلى باستاۋ العان كۇنى «قحا – 20 يگى ءىس» ەستافەتاسىنىڭ سيمۆولى – «تايقازاندى» قابىلداپ العان ساتتەگى اسەرلەرىمەن ءبولىستى. «تايقازانىمىز» جىلى كوڭىلدەرگە, قامقور كومەككە تولا بەرگەي دەگەن تىلەك ءبىلدىرىلدى.
كەزدەسۋگە قاتىسۋشىلاردىڭ تىلەگى بويىنشا وبلىستىق مۇراعات جانە قۇجاتتاما باسقارماسىنىڭ باسشىسى ناتاليا گلۋشكوۆسكايا مەن ءدىن ىستەرى جونىندەگى باسقارمانىڭ باسشىسى ساۋلە ىبىراەۆا ءوز ۇجىمدارى اتقارىپ جاتقان جۇمىستار جايلى ماعلۇمات بەردى. ماسەلەن, وبلىستىڭ مۇراعات جۇيەسى 21 مەملەكەتتىك مۇراعاتتى بىرىكتىرەدى ەكەن. بۇل رەسپۋبليكاداعى ەڭ ۇلكەن قۇرىلىم. مۇنداعى 5233 قوردا 309598 ءىس ساقتاۋلى. ۇجىم وتكەن جىلى جەكە تۇلعالار مەن ۇيىمداردىڭ 23 مىڭ سۇراۋ سالۋىن دەر كەزىندە قاناعاتتاندىرعان.
ال ساۋلە ىبىراەۆا وبلىس اۋماعىندا 205 ءدىني بىرلەستىك پەن 50 ميسسيونەرلىك قوزعالىس جۇمىس ىستەيتىندىگىن, ولار وڭىردەگى تۇسىنىستىك پەن تۇراقتىلىققا قىزمەت ەتەتىنىن ايتتى.
شارا بارىسىندا «دوستىق كىتابى» وبلىستىق مۇراعات جانە قۇجاتتاما باسقارماسىنىڭ باسشىسى ناتاليا گلۋشكوۆسكايا مەن وبلىستىق ستاتيستيكا دەپارتامەنتى باسشىسىنىڭ ورىنباسارى ەركىن كوكەنوۆاعا سالتاناتتى جاعدايدا تابىس ەتىلدى.
باقبەرگەن امالبەك,
«ەگەمەن قازاقستان».
اقمولا وبلىسى.