بەلگىلى قالامگەر, «Egemen Qazaqstan» گازەتىنىڭ ارداگەرى, قازاقستاننىڭ ەڭبەك سىڭىرگەن قايراتكەرى سۇلەيمەن مامەتتىڭ «قازاقتىڭ قاقىسى» اتتى جاڭا جيناعى جارىق كوردى. كىتاپقا اۆتوردىڭ كەيىنگى جازىلعان ەسسەلەرى مەن ماقالالارى, وي-تولعامدارى جانە سىر-سۇحباتتارى ەنگەن.
بۇل ەڭبەكتىڭ وقىرمانعا بەرەرى مول. كىتاپ ءۇش بولىمنەن تۇرادى. ءبىرىنشىسى – «جارىق پەن كولەڭكە», ەكىنشىسى – «قازاقتىڭ قاقىسى», ءۇشىنشىسى – «ايتۋ پارىز, بولماي قارىز» دەپ اتالادى. العاشقى ءبولىمىنىڭ بەتاشارى – «جەر» اتتى كولەمدى ماقالامەن اشىلعان. مۇندا جۋرناليست الەمدە جەر كولەمى جاعىنان 9-ورىن الاتىن ۇلان-عايىر دالامىزدىڭ قازىرگى جاعدايىن وتكەن تاريحپەن ساباقتاستىرىپ, وي قوزعايدى. «جەر قورىمىز الدا دايەكتەگەنىمىزدەي 272,5 ميلليون گەكتار دەسەك, ونىڭ 34 پايىزى عانا شۇرايلى سانالادى. ورماندى القابىمىز 26 ميلليون گەكتار, بۇل ەل اۋماعىنىڭ 4,6 پايىزى. سولاقايلىقتىڭ كەسىرىنەن سورى قايناعان ۇلتىمىزدىڭ 10 پايىزى عانا اۋىل شارۋاشىلىعىنا قولايلى ايماقتاردا تۇرادى. عالىمداردىڭ زەرتتەۋىنشە, قولايسىز اۋدانداردىڭ 87 پايىزى, ال ەكولوگيالىق جاعىنان اپات ايماعى دەپ ەسەپتەلەتىن جەردى مەكەن ەتىپ جاتقانداردىڭ 95 پايىزى ءوز قاراكوزدەرىمىز ەكەنىن دە ەسكە سالا كەتسەك دەيمىز», دەيدى.
بەلگىلى پۋبليتسيست باس باسىلىمدا ەڭبەك ەتكەن جىلدارى شەتەلگە كەتكەن قازاق بالالارى تۋرالى بىرنەشە سەريالىق ماقالا جازدى. ءتىپتى مۇحيتتىڭ ارعى جاعىنداعى اقش-قا «اتتانعان» ۇرپاقتى ىزدەپ بارعانى ەسىمىزدە. وسى جيناقتا دا بۇل تاقىرىپقا قايتا توقتالعان ەكەن. اۆتور «جۇرتىن ىزدەگەن ۇل مەن قىز» اتتى ماقالاسىندا بىلاي دەيدى: «شەتەلگە كەتكەن بالالاردىڭ ءتىزىمىن انىقتاۋ 1998 جىلى قابىلدانىپ, 1999 جىلدىڭ 1 قاڭتارىنان كۇشىنە ەنگەن «نەكە جانە وتباسى تۋرالى» زاڭنان كەيىن عانا مۇمكىن بولدى. سول كەزدەگى دەرەكتەرگە دەن قويساق, جۇرتىنان كوز جازىپ قالعانداردىڭ سانى – 1 797 ەكەن. كەيىن بۇل سان وسە بەردى. قازىر 10 مىڭعا تاياپ قالدى. سول 1999 جىلعى ەسەپتەگى 1 797 بالانىڭ 250-ءىنىڭ عانا دەرەگى ءبىلىم جانە عىلىم مينيسترلىگىندە بار بولىپ شىقتى, ال قالعان بالالاردىڭ قايدا «ساپارلاعانىن» ەشكىم بىلمەيدى».
قازىر قوعامدا يدەولوگيا تۋرالى ءجيى ايتىلادى. كەيبىرەۋلەر بىزدە «ۇلتتىق يدەولوگيا بار ما؟» دەپ سۇراقتى تىكەسىنەن قويادى. يدەولوگيانىڭ نەگىزى ۇلتتىق يدەيادا جاتقانى انىق. قالامگەر «ۇلتتىق يدەيا» اتتى وي-تولعامىندا ۇلتتىق يدەياسىز ۇلت بولمىسى قالىپتاسپايتىنىن اشىق جازعان.
سونداي-اق كىتاپتاعى ەل مەن جەر ماسەلەسىنەن بولەك, ۇلت قايراتكەرلەرى تۋرالى ەسسەلەرىمەن بىرگە مەكەمتاس مىرزاحمەت ۇلى, كامال ورمانتاەۆ, راحىمجان ەلەش ۇلى, ءشامشا بەركىمباەۆا, سەرىك اقشولاقوۆ سەكىلدى تانىمال تۇلعالاردان العان سۇحباتتارىن تۇشىنىپ وقيسىز.