سەنات توراعاسى ماۋلەن اشىمباەۆ پالەستينانىڭ جوعارعى سۋدياسى, پالەستينا پرەزيدەنتىنىڭ ءدىن ىستەرى جونىندەگى كەڭەسشىسى دوكتور ماحمۇد سەدكي ءال-حابباشپەن كەزدەستى. تاراپتار حالىقارالىق ۇيىمدار شەڭبەرىندە ەكى ەل اراسىنداعى ىنتىماقتاستىقتى نىعايتۋ ماسەلەلەرىن تالقىلادى جانە گازا سەكتورىنداعى گۋمانيتارلىق احۋال جونىندە پىكىر الماستى.
پالاتا سپيكەرى مەيمانعا ءىلتيپات ءبىلدىرىپ, قازاقستان پالەستينانى اراب الەمىندەگى ماڭىزدى سەرىكتەستەردىڭ ءبىرى رەتىندە قاراستىراتىنىن جانە ەكى ەل اراسىندا ءتۇرلى سالاداعى قاتىناستاردى دامىتۋعا مۇددەلى ەكەنىن اتاپ ءوتتى. كەزدەسۋدە ەكىجاقتى دوستىق قارىم-قاتىناستاردى نىعايتۋعا جوعارى دەڭگەيدەگى بەلسەندى جانە سەنىمدى ديالوگتىڭ ىقپالى زور ەكەنى دە ءسوز بولدى.
«بۇگىندە ەكى ەل اراسىندا ساياسي ديالوگ جوعارى دەڭگەيدە جالعاسىپ كەلەدى. پالەستينا پرەزيدەنتى ماحمۇد ابباستىڭ 2022 جىلى استانادا وتكەن ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ VI سامميتىنە قاتىسۋى – سونىڭ ايقىن دالەلى. سامميت اياسىندا قازاقستان پرەزيدەنتى قاسىم-جومارت توقاەۆ پالەستينا پرەزيدەنتىمەن كەزدەسكەنىن ەرەكشە اتاپ وتكەن ءجون. بۇل كەلىسسوزدەر ەكى ەل اراسىنداعى ءوزارا تۇسىنىستىك پەن سەرىكتەستىكتى نىعايتۋعا ماڭىزدى سەرپىن بەردى. ءبىز الداعى ۋاقىتتا دا سىزدەردىڭ ەلدەرىڭىزبەن ءتۇرلى سالاداعى ىنتىماقتاستىقتى دامىتۋعا مۇددەلىمىز ءارى پالەستينانى نىعايتۋعا باعىتتالعان باستامالاردى ءاردايىم قولدايمىز», دەدى م.اشىمباەۆ.
سونىمەن قاتار سەنات توراعاسى گازا سەكتورىنداعى بۇرىن-سوڭدى بولماعان گۋمانيتارلىق احۋالعا الاڭداۋشىلىق ءبىلدىردى. ول بەيبىت تۇرعىنداردىڭ زارداپ شەگۋى قابىرعانى قايىستىراتىنىن ايتىپ, جانجالدى ديپلوماتيالىق جولمەن شەشۋدىڭ ماڭىزدى ەكەنىن تىلگە تيەك ەتتى.
«قازاقستان بىرىككەن ۇلتتار ۇيىمىنىڭ ءتيىستى قارارلارىنا سايكەس, پالەستينا حالقىنىڭ زاڭدى قۇقىقتارىن, سونداي-اق «ەكى حالىق ءۇشىن ەكى مەملەكەت» قاعيداتىن دايەكتى تۇردە قولدايدى. قازاقستان پرەزيدەنتى قاسىم-جومارت توقاەۆ اتاپ وتكەندەي, جانجالدى ديپلوماتيالىق جولمەن شەشۋ – تۇراقتى بەيبىتشىلىك پەن قاۋىپسىزدىككە قول جەتكىزۋدىڭ جالعىز جولى. ءبىزدىڭ باستى قاعيداتىمىز – گۋمانيتارلىق كومەكتىڭ قاۋىپسىز, ۇزدىكسىز, شارتسىز قولجەتىمدى بولۋى, ازاماتتاردىڭ قورعالۋى جانە ينفراقۇرىلىمنىڭ قالپىنا كەلتىرىلۋى», دەپ م.اشىمباەۆ ەكى ەلدىڭ ازىق-ت ۇلىك قاۋىپسىزدىگى جونىندەگى يسلام ۇيىمى, يسلام ىنتىماقتاستىعى ۇيىمى جانە باسقا دا ينستيتۋتتار مەن حالىقارالىق ۇيىمدار اياسىنداعى ءوزارا ءىس-قيمىلدىڭ باسىم باعىتتارىنا نازار اۋداردى.
سونداي-اق تاراپتار الەمدىك جانە ءداستۇرلى دىندەر كوشباسشىلارىنىڭ سەزى شەڭبەرىندەگى بىرلەسكەن جۇمىستى تالقىلاپ, قاقتىعىستاردى بەيبىت جولمەن شەشۋدىڭ جانە رۋحاني ديپلوماتيانى دامىتۋدىڭ ماڭىزى جونىندە سۇحبات قۇردى.