دۇنيەجۇزىلىك بوكس ۇيىمى (WBO) ەرىكتى انتيدوپينگ قاۋىمداستىعىنان (VADA) ورتا سالماقتاعى الەم چەمپيونى جانىبەك ءالىمحان ۇلىنىڭ سىناماسىنا قاتىستى حابارلاما العانىن راستادى. WBO وتانداسىمىزدىڭ تالداۋىنداعى دوپينگتىڭ وڭ ناتيجەسىنە قاتىستى تەكسەرۋدى باستاعان, دەپ جازادى Egemen.kz.
ۇيىم بۇل تۋرالى الەۋمەتتىك جەلىدەگى پاراقشاسىندا جاريالادى.
«WBO ەرەجەلەرىنە سايكەس ءبىز ءاردايىم ادالدىقتى, سپورتشىلاردىڭ قاۋىپسىزدىگى جانە شىنايى باسەكەلەستىكتى قولدايمىز. سوندىقتان WBO ءوزىنىڭ ىشكى تەرگەۋىن باستايدى», دەلىنگەن WBO تاراتقان حابارلامادا.
مۇنداي تەكسەرىس جانىبەك ءالىمحان ۇلىنىڭ كۋبالىق ەريسلاندي لاراعا قارسى ءۇش بەلبەۋ ءۇشىن جەكپە-جەگىنىڭ الدىندا وتكىزىلگەن.
وتانداسىمىزدىڭ ءوزى وقيعاعا قاتىستى پىكىر ءبىلدىرىپ, جاڭالىقتى وقىعاندا تاڭعالعانىن مالىمدەدى.
«مەن ارقاشان تازا سپورت ءۇشىن كۇرەسكەنمىن, بارشاڭىز مۇنى جاقسى بىلەسىزدەر. جاڭالىقتى وقىعاندا قاتتى تاڭعالدىم. VADA العاشقى تەستتىڭ تازا ەكەنىن ايتتى. مەن ەشقانداي دارۋمەن قابىلداۋ ءتارتىبىن وزگەرتپەدىم. ەكىنشى تەستتە نە بولعانىن بىلمەيمىن, سوندىقتان تولىق قايتا تەكسەرۋدى تالاپ ەتتىم», دەپ جازدى ول ءوزىنىڭ ح پاراقشاسىندا.
جانىبەك ءالىمحان ۇلىنىڭ دوپينگ تەستىنەن وتپەي قالعانىن ءبىرىنشى بولىپ «The Ring magazine» كاسىپقوي بوكس باسىلىمى حابارلادى.
ايتا كەتەيىك, 7 جەلتوقسان كۇنى وتانداسىمىز, كاسىپقوي بوكسشى جانىبەك ءالىمحان ۇلى ءۇش بەلبەۋ ءۇشىن كۋبالىق ەريسلاندي لاراعا قارسى تاريحي جەكپە-جەگىن وتكىزۋى كەرەك ەدى. ءدال قازىر جەكپە-جەك تاعدىرى قىل ۇستىندە تۇر.