كاسىپ باستاپ, ءىس اياسىن كەڭەيتىپ جاتقاندار تۋرالى ءسوز بولا قالسا, «تانىسى كوپتىڭ تابىسى دا كوپ بولادى» دەپ بايلام جاسايتىندار بار ءالى بىزدە. سالانىڭ قىر-سىرىن بىلمەيتىندەرگە كاسىپكەر جىلداپ جيناعان قورىن جۇمساپ, بىردەن بەرەكەگە كەنەلە كەتكەندەي كورىنىپ تۇرادى. كەيىپكەرىمىز جادىرا جۇمابەكوۆانىڭ باستاماسى جاڭاعىداي وي جەتەگىندە جۇرگەندەرگە بەرىلگەن جاۋاپ سياقتى.
وسى كۇنى جۇرتتىڭ كوبى جاقسىلىق پەن جاڭالىقتى قالادان ىزدەيتىن بولدى عوي. جادىرا بۇل بايلاممەن كەلىسە بەرمەيدى. سىرداريا اۋدانىنداعى شىركەيلى اۋىلىندا تۋىپ, قىزىلورداداعى قورقىت اتا ۋنيۆەرسيتەتىندە وقىدى. سەگىز جىل بۇرىن قالاعا كەلىن بولىپ ءتۇسىپ, جۇمىستى دا شاھاردان تاپتى. بالاباقشادا, كوررەكتسيالىق ورتالىقتا جۇمىس ىستەدى. جۇمىسى كىدىرىپ, ۇيگە قامالىپ قالعان پاندەميا كەزىندە ءبىر جالاقىعا عانا سەنىپ جۇرە بەرمەۋ كەرەكتىگىن تۇسىنگەندەي بولدى. قۇرت قايناتىپ, ماي شايقاعان اۋىلدا وسكەندىگى تىعىرىقتان شىعاردى.
«سول تۇستا دەكرەتتىك دەمالىستا بولاتىنمىن. ۇيدە وتىرىپ, توي داستارقانىنا لايىقتاپ تاعامدار ىستەۋگە كىرىستىم. العاشقى تۇتىنۋشىلارىم – الەۋمەتتىك جەلى ارقىلى جاساعان جارنامامەن تانىسقان كورشىلەرىم ەدى», دەيدى جادىرا.
كاسىبىن كەڭەيتۋ ماقساتىندا قارجىلاي قولداۋعا بەرگەن ءوتىنىشى ەكى جىل قاتارىنان كەرى قايتقان كەزى دە بولدى. بىراق تاۋى شاعىلعان جوق. «بيزنەس باستاۋ» جوباسى شەڭبەرىندە كاسىپكەرلىك نەگىزدەرىن وقىتۋدىڭ ونلاين كۋرسىن اياقتاپ, بىلتىر جاڭا بيزنەس-يدەيالاردى ىسكە اسىرۋعا ارنالعان مەملەكەتتىك گرانتتاردى بەرۋ جونىندەگى كوميسسيانىڭ شەشىمىنە سايكەس 1 572 800 تەڭگە كولەمىندە مەملەكەتتىك گرانت ۇتىپ الدى.
جاساعان بيزنەس جوسپارى ءسۇت ونىمدەرىنە قاتىستى ەدى. گرانت قارجىسىنا 55 ليترلىك ەلەكتر كۇبى الدى. جوسپارمەن جۇمسالعان قارجى ءسۇت تارتاتىن سەپاراتور, ەكى بۇزاۋلى سيىر الۋعا دا جەتتى. وسى كۇنى جادىرا ازىرلەگەن ايران, قاتىقتى, سۇزبەسى مەن ىرىمشىگىن جۇرت تالاسا الادى. كاسىپكەر اعارعاننان ەشقانداي قالدىق قالمايتىنىن ايتادى. ەڭ سوڭعى سارىسۋىنىڭ ىشەك ميكروفلوراسىن جوندەپ, ءوتتى دۇرىستايتىن قاسيەتى بار.
«مانساپ» ورتالىعى قولداۋ العان كاسىپكەرلەردى ءتۇرلى كورمەدەن قالدىرمايدى. سوعان بارعاندا ءوزى سەكىلدى كوپتەگەن كەلىنشەكپەن تانىستى. بارلىعى ءوزى سەكىلدى كوپبالالى انالار ەكەن. مۇنداي ءىس-شارالار – تاجىريبە الماسىپ, ءىس اۋقىمىن كەڭەيتۋگە تاپتىرماس مۇمكىندىك الاڭى. ويتكەنى بيزنەس باسەكەدەن عانا تۇرمايدى. ءىستى العا ىلگەرىلەتەتىن يدەيالار دا وسىنداي كەزدەسۋلەردە تۋادى.
«جازدىڭ كۇندەرى دۇكەندەرگە اشىتپا, بيداي, جۇگەرى كوجەلەرىن, ءوزىم دايىنداعان كومپوتتى وتكىزەمىن. ەلدىڭ وسى كۇنى قۇرامىندا حيميالىق قوسىندىسى كوپ, كۇماندى ازىق-ت ۇلىكتەن باس تارتىپ, تازا ونىمدەرگە سۇرانىسى كوبەيىپ كەلە جاتقانى بايقالادى. سوعان قۋانامىن. ويتكەنى ساپالى اس – ساۋلىقتىڭ كەپىلى», دەيدى كاسىپكەر.
كاسىپتە مەملەكەت قولداۋى كوپ مۇمكىندىككە جول اشاتىنىنىڭ ءبىر دالەلى – وسى جادىرانىڭ باستاماسى. ماماندىعى جونىندەگى جۇمىستى تاستاپ, ءبىرجولا بيزنەسكە بەت بۇردى. ءىسىن جولعا قويىپ, ەل ەكونوميكاسىنىڭ دامۋىنا ءوز ۇلەسىن قوسىپ وتىرعان جان الدا كاسىبىنىڭ اياسىن كەڭەيتە ءتۇسۋدى جوسپارلاپ وتىر. ال تالپىنعاننىڭ تابىسى كوپ بولادى.
قىزىلوردا