بيىلعى قىسقى شاقىرىلىم شەڭبەرىندە ەلدىڭ تۇكپىر-تۇكپىرىنەن اسكەري بورىشىن وتەۋگە كەلگەن ورەندەر اسكەري ءبولىم اۋماعىنا سالتاناتتى تۇردە جەتكىزىلدى. 10 وڭىردەن كەلگەن جاس ساربازدار تىركەۋدەن ءوتىپ, باستاپقى قۇجاتتىق راسىمدەۋلەرىن اياقتادى. بۇل – اقمولا, قوستاناي, قىزىلوردا, اقتوبە, الماتى, تۇركىستان, جەتىسۋ, پاۆلودار, اباي, قاراعاندى وبلىستارىنان كەلگەن جاس تولقىن, دەپ جازادى Egemen.kz.
جاقىن كۇندەرى تاعى 8 ايماقتىڭ جاس بۋىنى كەلىپ قوسىلماق.
وسىلايشا, ءبولىم جاڭا شاقىرىلىمدى تولىق قابىلداپ, ۇلكەن اسكەري مەكتەپتىڭ العاشقى ساباعىن باستاۋعا دايىن تۇر.
ۇلتىق ۇلاننىڭ مالىمەتىنشە, العاشقى كەزەڭدە بارلىق جاس ساربازدار وقۋ روتالارىنا ءبولىنىپ, باستاپقى جاۋىنگەرلىك دايىندىقتان وتەدى. مۇندا ولار اسكەري ءتارتىپ نەگىزدەرىمەن, قارۋ-جاراقپەن جۇمىس ىستەۋ ەرەجەلەرىمەن, ساپتىق دايىندىقپەن, سونداي-اق بولىمشەنىڭ ىشكى تارتىپتەرىمەن تانىسادى. تاجىريبەلى نۇسقاۋشىلار مەن وفيتسەرلىك قۇرام ولارعا جان-جاقتى ادىستەمەلىك كومەك كورسەتىپ, جاڭا ورتاعا تەز بەيىمدەلۋىنە ىقپال ەتپەك.
جاڭا شاقىرىلىم قۇرامىندا اقتوبە وبلىسىنان كەلگەن جاس سارباز قۋانىش قۇماروۆ تا بار. ول ءوزىنىڭ اسكەري بولىمگە العاش قادام باسقانداعى اسەرىمەن ءبولىستى.
«ۇلتتىق ۇلان ساپىنا قابىلدانعانىما ەرەكشە قۋانىشتىمىن. بۇل – ءاربىر جىگىتتىڭ ومىرىندەگى جاۋاپتى كەزەڭ. مۇندا كەلگەن العاشقى ساتتەن-اق ءبىزدى جىلى قارسى الىپ, تۇسىندىرمە جۇمىستارىن جۇرگىزدى. ءوزىمدى جاڭا ورتادا سەنىمدى سەزىنىپ كەلەمىن. ەلىمنىڭ الدىنداعى بورىشىمدى ادال اتقارۋعا دايىنمىن», دەيدى ول.
5573 اسكەري ءبولىمىنىڭ باسشىلىعى جاس ساربازداردىڭ اسكەري ومىرگە تەز بەيىمدەلۋىن قامتاماسىز ەتۋ ماقساتىندا بارلىق قاجەتتى شارالاردى قولعا العان. ازىق-ت ۇلىكپەن, كيىم-كەشەكپەن, تۇرمىستىق زاتتارمەن تولىق قامتاماسىز ەتۋ, اسكەري-تاكتيكالىق دايىندىقتى كەزەڭ-كەزەڭىمەن جۇرگىزۋ – ءبولىم ءۇشىن باستى مىندەتتەردىڭ ءبىرى.
الداعى اپتالاردا وقۋ روتالارىندا قارقىندى دايىندىق باستالىپ, جاۋىنگەرلەر انت قابىلداۋ راسىمىنە دايىندالادى. بۇل – ولاردىڭ اسكەري ومىردەگى ەڭ ماڭىزدى ءارى جاۋاپتى قادامدارىنىڭ ءبىرى بولماق.