جامبىل وبلىسىنا قاراستى ت.رىسقۇلوۆ اۋدانىنىڭ ورتالىق اۋداندىق اۋرۋحاناسىندا قازان ايىندا بولعان 6 جاسار بالانىڭ ولىمىنەن كەيىن وبلىس اكىمدىگى ارنايى جۇمىس توبىن قۇرىپ, جوسپاردان تىس تەكسەرىس جۇرگىزگەن, دەپ حابارلايدى Egemen.kz.
«جاعدايعا بايلانىستى اكىمدىكتە جۇمىس توبى قۇرىلدى, ءبىز جوسپاردان تىس تەكسەرۋ وتكىزدىك. تەكسەرۋگە تاۋەلسىز ساراپشىلار دا تارتىلدى. سونىمەن قاتار, دەنساۋلىق ساقتاۋ مينيسترلىگىنىڭ مەديتسينالىق جانە فارماتسەۆتيكالىق باقىلاۋ كوميتەتىنىڭ دەپارتامەنتى دە تەكسەرۋ جۇرگىزدى. ناتيجەسىندە باس دارىگەر قىزمەتىنەن بوساتىلدى», دەدى وبلىس اكىمى ەربول قاراشوكەەۆ.
وقيعادان كەيىن باسقا مەديتسينالىق مەكەمەلەردىڭ باسشىلارىمەن دە جۇمىس جۇرگىزىلگەن. وبلىس اكىمى جاعدايدىڭ ءوزىنىڭ جەكە باقىلاۋىندا ەكەنىن اتاپ ءوتتى.