7 جەلتوقسان كۇنى وتانداسىمىز, كاسىپقوي بوكسشى جانىبەك ءالىمحان ۇلى ءۇش بەلبەۋ ءۇشىن كۋبالىق ەريسلاندي لاراعا قارسى تاريحي جەكپە-جەك وتكىزەدى. قازاقستان ۋاقىتىمەن 6: 00-دە باستالاتىن جەكپە-جەكتى «Qazsport» جانە «Qazaqstan» ارنالارى تىكەلەي ەفيردە ۇسىنادى, دەپ جازادى Egemen.kz.
جەكپە-جەك اقش-تىڭ تەحاس شتاتى سان-انتونيو قالاسىنداعى Frost Bank Center ارەناسىندا وتەدى.
قوس مىقتىنىڭ ايقاسىندا ورتا سالماقتاعى ءۇش الەمدىك تيتۋل: ءالىمحان ۇلىنا تيەسىلى WBO جانە IBF, لارانىڭ ەنشىسىندەگى WBA بەلبەۋلەرى ساراپقا سالىنادى.
«Qazaq Style» مەن «The American Dream» سىندى لاقاپ ات يەلەرىنىڭ كەزدەسۋى 12 راۋندقا جوسپارلانعان.
بۇعان دەيىن جانىبەك ءالىمحان ۇلى جەكپە-جەككە قىزۋ دايىندالىپ جاتقانىن مالىمدەگەن.
ال كۇنى كەشە وتانداسىمىز ۇندەۋ جاساپ, جانكۇيەرلەرىن ارەناعا ەلىمىزدىڭ كوك تۋىمەن كەلۋگە شاقىرعان.
«Qazaq Style» ەلىمىزگە ءۇش بەلبەۋمەن كەلۋگە ۋادە بەرىپ وتىر.
ايتا كەتەيىك, جانىبەك ءالىمحان ۇلى سوڭعى جەكپە-جەگىن استانادا وتكىزىپ, اناۋەل نگاميسسەنگەنى 5-راۋندتا نوكاۋتقا جىبەرىپ, بەلبەۋلەرىن ءساتتى قورعاعان ەدى.