2026 جىلدىڭ 6–22 اقپان كۇندەرى يتاليانىڭ ميلان جانە كورتينا-د’امپەتستسو قالالارىندا ءتورت جىلدىقتىڭ باستى دوداسى – XXV قىسقى وليمپيا ويىندارى وتەدى. بايراقتى باسەكەگە الەمنىڭ 93 ەلىنەن 3 500-دەن استام سپورتشى قاتىسادى. ولاردىڭ قاتارىندا ەل سپورتشىلارى دا بار, دەپ جازادى Egemen.kz.
قازىرگى ۋاقىتتا سپورتشىلار قىسقى وليمپياداعا قاتىسۋعا مۇمكىندىك بەرەتىن جولدامالاردى الۋ ءۇشىن حالىقارالىق جارىستار مەن الەم كۋبوگى كەزەڭدەرىنە قاتىسىپ جاتىر. وليمپيادا ليتسەنزياسى سول جارىستارداعى ناتيجەلەر مەن جيناعان ۇپاي سانىنا قاراي بەرىلەدى. قازاقستان قورجىنىندا ازىرگە ەكى ليتسەنزيا بار. ولار مانەرلەپ سىرعاناۋشىلار ميحايل شايدوروۆ پەن سوفيا سامودەلكيناعا تيەسىلى.
قازىرگى تاڭدا شورت-ترەكتەن قازاقستان ۇلتتىق قۇراماسى الەمدىك تۋردى اياقتادى. بۇل سپورت تۇرىنەن سوڭعى, ياعني IV كەزەڭ وتكەن اپتا نيدەرلاند كورولدىگىنىڭ دوردرەحت قالاسىندا ۇيىمداستىرىلدى. ەندى الداعى ۋاقىتتا شورت-ترەكتەن وليمپياداعا باراتىن سپورتشىلاردىڭ ەسىمدەرى انىقتالماق.
ال كونكيمەن جۇگىرۋ سپورتشىلارى 5–7 جەلتوقساندا نيدەرلاندتىڭ حەرەنۆەن, 12–14 جەلتوقساندا حامار قالاسىندا وتەتىن الەم كۋبوگى كەزەڭدەرىندە باق سىنايدى.
مانەرلەپ سىرعاناۋدان بىلتىرعى الەم چەمپيوناتىندا ميحايل شايدوروۆ پەن سوفيا سامودەلكينا وليمپيادا ءنورماتيۆىن ورىنداپ, ليتسەنزيا الىپ قويعان بولاتىن. دەگەنمەن, ميحايل 4–7 جەلتوقساندا جاپونيانىڭ ناگويا قالاسىنداعى گران-پري جارىسىنا, ال سوفيا 3–6 جەلتوقسان ارالىعىندا حورۆاتيا استاناسى زاگرەبتەگى تۋرنيرگە قاتىسادى.
فريستايل-موگۋل سپورتشىلارى 4 جەلتوقساننان 2026 جىلدىڭ 18 قاڭتارىنا دەيىن فينليانديا, كانادا جانە اقش-تاعى الەم كۋبوگىنە جانە فرانتسياداعى FIS حالىقارالىق تۋرنيرىنە بارادى.
فريستايل-اكروباتيكا وكىلدەرى 6 جەلتوقساننان 2026 جىلعى 18 قاڭتارىنا دەيىنگى بەس الەم كۋبوگى كەزەڭىندە باق سىنايدى. جارىستار فينليانديا, قىتاي جانە اقش-تا ء(ۇش كەزەڭ) وتەدى.
بياتلونشىلار التى الەم كۋبوگى كەزەڭى مەن التى IBU اياسىنداعى حالىقارالىق تۋرنيرگە قاتىسۋى قاجەت. الەم كۋبوگى كەزەڭدەرى شۆەتسيا, اۋستريا, فرانتسيا, گەرمانيا (ەكى كەزەڭ) جانە چەحيادا وتسە, حالىقارالىق تۋرنيرلەر اۋستريا, يتاليا, شۆەيتساريا, گەرمانيا, سلوۆەنيا جانە نورۆەگيادا ۇيىمداستىرىلادى.
شاڭعىشىلار فينليانديا, نورۆەگيا, شۆەيتساريا جانە يتاليادا وتەتىن بەس الەم كۋبوگى كەزەڭىندە باق سىناسا, شاڭعىمەن ترامپليننەن سەكىرۋشىلەر 12 الەم كۋبوگىنە, ەكى قۇرلىقتىق, ەكى FIS كۋبوگىنە, ەكى اۋستريا-گەرمانيا تۋرنيرىنە جانە ءبىر قۇرلىقارالىق جارىسقا قاتىسادى. جارىستار 20 قاراشادان 2026 جىلدىڭ 18 قاڭتارىنا دەيىن جوسپارلانعان. ازىرگە وتانداستارىمىز ەكى الەم كۋبوگىنە قاتىسىپ ۇلگەردى.
تاۋ شاڭعىسى سپورتشىلارى توعىز الەم كۋبوگى كەزەڭىندە باق سىنايدى. قازىر ءۇش كەزەڭ اياقتالدى, ال الداعى التى كەزەڭ 12 جەلتوقسان مەن كەلەر جىلدىڭ 25 قاڭتارى ارالىعىندا شۆەيتساريا, فرانتسيا, اۋستريا جانە چەحيادا وتەدى.
شاڭعى قوسسايىسىندا التى الەم كۋبوگى بار. ءبىرىنشى كەزەڭ فينليانديادا وتسە, كەيىنگىلەرى نورۆەگيا, اۋستريا جانە گەرمانيادا ۇيىمداستىرىلىپ, 4 جەلتوقساننان 2026 جىلدىڭ 1 اقپانىنا دەيىن جالعاسادى.