گرانتتىق قارجىلاندىرۋ اياسىندا قازاق سۋ شارۋاشىلىعى عىلىمي-زەرتتەۋ ينستيتۋتى يرريگاتسيا مەن مەليوراتسيا سالالارىندا ءتورت جوبانى جۇزەگە اسىرىپ جاتىر. سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ عىلىمي ۇيىمنىڭ جىل باسىنان بەرى اتقارعان جۇمىسى تۋرالى ەسەبىن تىڭدادى, دەپ جازادى Egemen.kz.
ىسكە اسىرىلىپ جاتقان جوبالار دەگراداتسيالانعان سۋارمالى جەرلەردىڭ جاعدايىن جاقسارتۋ تەحنولوگياسىن ازىرلەۋدى, جامبىل وبلىسىنداعى شۋ وزەنىنىڭ تومەنگى اعىسىن سۋمەن قامتاماسىز ەتۋدىڭ عىلىمي-ادىستەمەلىك نەگىزدەرىن جاساۋدى, شاعىن سۋ وتكىزۋ كولەمى بار سۋارۋ كانالدارىنا قولدانۋعا بولاتىن گيدروتەحنيكالىق اۆتوماتتاندىرىلعان قاقپانىڭ مودەلىن ازىرلەۋدى, سونداي-اق درەناج سۋىن قايتا پايدالانۋ ارقىلى سۋارمالى جەرلەردىڭ سۋمەن قامتىلۋىن ارتتىرۋدى قامتيدى.
بۇگىندە «سۋ شىعىنى از سۋارۋ كانالدارىندا قولدانۋعا ارنالعان گيدروتەحنيكالىق اۆتوماتتاندىرىلعان قاقپانىڭ مودەلىن ازىرلەۋ» جوباسى بويىنشا مودەلدىڭ سىزباسى, پايدالانۋشى ينتەرفەيسى جانە دەرەكتەر بازاسى دايىندالعان.
«جامبىل وبلىسىنداعى شۋ وزەنىنىڭ تومەنگى اعىسىن سۋمەن قامتاماسىز ەتۋدىڭ عىلىمي-ادىستەمەلىك نەگىزدەرى» جوباسى اياسىندا سۋ شارۋاشىلىعى ءىس-شارالارىنىڭ جوسپارى ازىرلەنگەن.
درەناج سۋىن سۋارۋ ماقساتىندا قايتا پايدالانۋ جوباسى اياسىندا اۋىل شارۋاشىلىعى داقىلدارىن درەناج سۋىمەن سۋارۋعا ارنالعان تەحنولوگيا دايىندالىپ, وعان پاتەنت الىنعان. بۇل ءادىس اۋىل شارۋاشىلىعى وندىرۋشىلەرىنە تاجىريبە جۇزىندە كورسەتىلگەن.
«قازاقستاننىڭ سۋ شارۋاشىلىعى سالاسىن دامىتۋ ءۇشىن عىلىم وتە ماڭىزدى. ءبىزدىڭ مينيسترلىك جۇزەگە اسىراتىن ءاربىر جوبانىڭ عىلىمي نەگىزدەمەسى بولۋى ءتيىس. سوندىقتان قازاق سۋ شارۋاشىلىعى عىلىمي-زەرتتەۋ ينستيتۋتىنا ءۇمىت ارتامىز. بۇگىندە مينيسترلىك ينستيتۋتتى قارجىلاندىرۋ ماسەلەسىن تولىق شەشتى. ەندى سۋ رەسۋرستارىن ءتيىمدى پايدالانۋعا مۇمكىندىك بەرەتىن ناقتى ناتيجەلەر قاجەت. ينستيتۋت مينيسترلىكتىڭ بارلىق باستاماسىنا بەلسەندى قاتىسىپ, ءار جوبانى جان-جاقتى عىلىمي تۇرعىدان تالداۋى كەرەك», دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.