كەشە «قازمەديا» ورتالىعىندا قحا كەڭەسىنىڭ مەرزىمىنەن بۇرىن پرەزيدەنتتىك سايلاۋ وتكىزۋ تۋرالى باستاماسىنا وراي, كەزەكتى بريفينگ ۇيىمداستىرىلدى. وعان «قازاقستان جاستارى كونگرەسى» بىرلەستىگىنىڭ اتقارۋشى ديرەكتورى عاني سۇلتان ۇلى, اتقارۋشى ديرەكتوردىڭ ورىنباسارى ايدىن ءسابيتوۆ, سونداي-اق, بىرلەستىكتىڭ وكىلدەرى ەرلان قىستاۋباەۆ پەن ءاليا سارسەكەەۆا جانە دانيار مەدەتوۆ قاتىستى.
«قازاقستان جاستارى كونگرەسى» ەلىمىزدىڭ الدىڭعى قاتارلى جاستار ۇيىمدارىنىڭ ءبىرى رەتىندە قحا-نىڭ مەرزىمىنەن بۇرىن پرەزيدەنتتىك سايلاۋ وتكىزۋ تۋرالى باستاماسى بويىنشا ءوز ۇستانىمىن ءبىلدىرۋدى ماڭىزدى دەپ ەسەپتەيدى. ەلىمىزدە ساياسي-الەۋمەتتىك تۇراقتىلىق, ەتنوسارالىق جانە كونفەسسياارالىق كەلىسىم ساقتالىپ كەلەدى. ەلىمىزدىڭ مىقتى ەكونوميكالىق ىرگەتاسى قالىپتاسقان. 2014 جىلعى الەمدىك داعدارىسقا قاراماستان, ەكونوميكالىق ءوسىم 4 پايىزدى قۇرايدى. ازاماتتاردىڭ ءال-اۋقاتى كۇننەن-كۇنگە ارتىپ كەلەدى, جاڭا جۇمىس ورىندارى اشىلۋدا, وڭىرلەردە دە ەكونوميكالىق ءوسىم بايقالۋدا, دەپ باستادى ءوز ءسوزىن ع. سۇلتان ۇلى. سونداي-اق, ول الەمدە كۇردەلى جاعداي قالىپتاسىپ كەلە جاتقانىنا, بۇل, ەڭ الدىمەن, دۇنيەجۇزىندەگى ەكونوميكالىق جۇيەنىڭ تۇراقسىزدىعىنان تۋىنداپ وتىرعانىنا, قازىرگى تاڭدا جۇمىسسىزدىق دەڭگەيى كوپ ەلدە ارتقانىنا, ونىڭ ىشىندە جاستار اراسىنداعى جۇمىسسىزدىق ءجيى بايقالاتىنىنا توقتالىپ ءوتتى.
مەملەكەت باسشىسىنىڭ باستاماسىمەن «نۇرلى جول» باعدارلاماسى ىسكە اسىرىلىپ كەلەدى. الدىن الا قۇرىلعان ۇلتتىق قوردىڭ ارقاسىندا داعدارىس كەزىندە ەلىمىز ەڭ الدىمەن, ەكونوميكالىق, الەۋمەتتىك سالالاردى قولداۋعا مۇمكىندىك الاتىن بولادى. جاڭا جۇمىس ورىندارى قۇرىلىپ, جولدار سالىنا باستادى. ينفراقۇرىلىم نىساندارى بوي كوتەرۋدە. بۇگىندە مەرزىمىنەن بۇرىن پرەزيدەنتتىك سايلاۋ وتكىزۋ قازاقستان قوعامىندا, ونىڭ ىشىندە جاستار اراسىندا كەڭىنەن تالقىلانۋدا. ءبىز ءبارىمىز مەرزىمىنەن بۇرىن سايلاۋ وتكىزۋ تۋرالى باستامانى تولىقتاي قولدايمىز. ءدال قازىر سايلاۋ وتكىزۋ قوعامدا تۇراقتىلىق پەن بىرلىكتى ساقتاۋعا جاعداي جاسايدى. بۇل – العا قويعان مىندەتتەردى ءتيىمدى ىسكە اسىرۋ, تۇرعىنداردىڭ ءال-اۋقاتىن ارتتىرۋ ءۇشىن ماڭىزدى قادام. بۇل سايلاۋدى وتكىزۋ «قازاقستان-2050» ستراتەگياسىنىڭ باسىم باعىتتارىن ىسكە اسىرۋدى قامتاماسىز ەتەر ەدى. سوندىقتان, «قازاقستان جاستارى كونگرەسى» ءاردايىم ەلىمىزدىڭ تۇراقتى دامۋى مەن وركەندەۋىنە باعىتتالعان باستامالاردى, سونىڭ ىشىندە جاستارعا جاعداي جاساۋعا, ولاردىڭ ءومىرىن جاقسارتۋعا باعىتتالعان باستامالاردى ارقاشان قولداۋعا دايىن ەكەندىگىن بىلدىرەدى, دەدى «قازاقستان جاستارى كونگرەسى» بىرلەستىگىنىڭ اتقارۋشى ديرەكتورى.
اتقارۋشى ديرەكتوردىڭ ورىنباسارى ايدىن ءسابيتوۆ تە ءدۇنيەجۇزىندەگى ەكونوميكالىق جاعداي تەربەلمەلى كۇيدە تۇرعاندىقتان, ساراپشىلاردىڭ باعالاۋىنشا, ونىڭ سالقىنى بىرنەشە جىلعا سوزىلاتىنىن تىلگە تيەك ەتتى. «سوندىقتان, مۇنداي جاعدايدا ەلدەگى ساياسي-ەكونوميكالىق تۇراقتىلىق پەن قوعامداعى بىرلىكتى ساقتاۋ ءۇشىن دۇرىس ساياسي باعدار ۇستانۋ ايرىقشا وزەكتى بولار ەدى, دەدى ا.ءسابيتوۆ.
ءلايلا ەدىلقىزى,
«ەگەمەن قازاقستان».
استانا.
سۋرەتتى تۇسىرگەن
ەرلان وماروۆ.