وكسفورد اعىلشىن ءتىلىنىڭ سوزدىگى 2025 جىلى ەڭ ءجيى قولدانىلعان ءسوز رەتىندە «رەيدجبەيت» (rage bait – ىزانى قوزدىرۋعا ارنالعان) تەرمينىن تاڭدادى. سوڭعى 12 اي ىشىندە «رەيدجبەيت» ءسوزىنىڭ قولدانىلۋ جيىلىگى ءۇش ەسە ارتقان, دەپ جازادى Egemen.kz.
Rage bait – ادەتتە بەلگىلى ءبىر ۆەب-بەتكە نەمەسە الەۋمەتتىك جەلىدەگى اككاۋنتقا ترافيك پەن نازار تارتۋ ءۇشىن جاريالاناتىن, ادەيى اشۋ-ىزا نەمەسە نارازىلىق تۋدىرۋعا باعىتتالعان, ارانداتۋشىلىق نەمەسە قورلايتىن مازمۇن.
«2025 جىلعى جاڭالىقتار لەگىندە الەۋمەتتىك تولقۋلار, ونلاين-كونتەنتتى رەتتەۋ تۋرالى پىكىرتالاستار جانە تسيفرلىق ءال-اۋقاتقا قاتىستى الاڭداۋشىلىقتار باسىم بولدى. ءبىزدىڭ ساراپشىلار بيىل rage bait ءسوزىنىڭ قولدانىلۋىنىڭ وزگەرگەنىن بايقادى, بۇل – ينتەرنەتتەگى بەلسەندىلىك جانە ەتيكا تۋرالى اڭگىمەلەردىڭ وزگەرىسكە ۇشىراعانىن كورسەتەدى», دەلىنگەن وكسفورد ۋنيۆەرسيتەتى باسپاسىنىڭ (Oxford University Press) حابارلاماسىندا.
ال, كەمبريدج سوزدىگى 2025 جىلدىڭ ءسوزىن «پاراسوتسيالدى» دەپ جاريالاعان.