قازاقستان فۋتبولىنىڭ ەڭ قىمبات جوبالارىنىڭ ءبىرى, چەمپيوندار ليگاسىنىڭ توپتىق كەزەڭىندە ويناعان «استانا» بۇگىندە بۇرىن-سوڭدى بولماعان داعدارىستىڭ قاق ورتاسىندا تۇر, دەپ جازادى Egemen.kz.
«سامۇرىق-قازىنا» قورىنىڭ 2026 جىلعا ارنالعان رەسمي جوسپارى بويىنشا كلۋبقا مۇلدە قارجى بولىنبەيتىنى بەلگىلى بولدى.
كلۋب ويىنشىلارى بيىل بار بولعانى ءبىر رەت قانا جالاقى العان. باپكەرلىك شتاب تا وسى كۇيدى باستان كەشىرىپ وتىر. ا5 كەڭسەدەگى قىزمەتكەرلەردىڭ كەيبىرى ءۇش ايدان بەرى ەڭبەكاقىسىن الماعانى بەلگىلى بولدى. قازىر ەلوردالىق كوماندا جەدەل تۇردە ينۆەستور ىزدەۋ ۇستىندە.
«استانا» فۋتبول كلۋبى – جاي عانا كلۋب ەمەس, قازاقستان فۋتبولىنىڭ ايرىقشا برەندى. بۇل برەندتىڭ جوعالۋى بۇكىل پرەمەر-ليگا ءۇشىن اۋىر سوققى بولماق. تاياۋ ارادا ينۆەستور تابىلماسا, كلۋب جابىلۋى مۇمكىن.
دەمەۋشىلىك جاساپ جۇرگەن كىشىگىرىم اكتسيونەرلىك قوعامدار «سامۇرىق» بولگەندەي قاراجات بەرە المايدى. مارين توماسوۆ سەكىلدى 30 ملن تەڭگە ايلىق الاتىن لەگيونەرلەرى بار, ءار جىل سايىن ەۋروكۋبوكتە ونەر كورسەتەتىن كوماندا شىعىندارىن وتەپ وتىرۋ كەز كەلگەن كومپانيانىڭ قولىنان كەلمەيدى. سوڭعى التى جىلدا «سامۇرىق-قازىنا» كلۋبتى قارجىلاندىرۋعا 50 ملرد تەڭگە جۇمساپتى. الايدا سول ۋاقىتتاردا اقشادان تارشىلىق كورمەگەن ۇجىمنىڭ فۋتبولداعى ناتيجەسى جاقسى دەۋگە كەلمەيدى.
بيىل ەلوردالىق ۇجىم ەل چەمپيوناتىندا 2-ورىن الدى. ەۋروكۋبوك دوداسىندا ءساتتى ونەر كورسەتە المادى.