ەلىمىزدە 1 جەلتوقساننان باستاپ اۆتوكولىكتەردى ليزينگكە بەرۋ باعدارلاماسى ىسكە قوسىلادى. يندۋستريا مينيسترلىگى جىلدىق مولشەرلەمەنى الدىن الا 36%-عا دەيىن دەپ بەكىتتى, دەپ حابارلايدى Egemen.kz.
قازىرگى ۋاقىتتا نارىق قاتىسۋشىلارى باعدارلامانىڭ تەتىكتەرىن پىسىقتاپ جاتىر.
باعدارلامانىڭ ماقساتى – اۆتوكولىك ساتىپ الۋدى قولجەتىمدى ەتۋ. ەكىنشى دەڭگەيلى بانكتەر, ليزينگتىك كومپانيالار مەن اۆتوسالوندار بىرلەسكەن ءتاسىل قالىپتاستىرىپ, پايىزدىق مولشەرلەمەنى نەگىزسىز كوتەرمەۋى ءتيىس. كليەنتتەرگە ەڭ جوعارى شەكتەلگەن مولشەرلەمەدەن تومەن ستاۆكا ۇسىنۋ ءۇشىن ىشكى سۋبسيديالاۋ مەحانيزمىن ەنگىزۋ جونىندەگى كەلىسسوزدەر جالعاسىپ جاتىر.
ءماجىلىس دەپۋتاتى ولجاس قۇسبەكوۆتىڭ ايتۋىنشا, اۆتوسالون كولىكتى ارزان باعادا بەرەدى, ليزينگتىك كومپانيا ءوز پايىزىن تومەندەتەدى, سونداي-اق ەكىنشى دەڭگەيلى بانكتەر دە اۆتوموبيل ليزينگى بويىنشا پايىزدارىن ازايتادى.
«جۋىردا ولار ءباسپاسوز ءماسليحاتىن وتكىزىپ, بۇل ءونىم بويىنشا پايىزدى قانشالىقتى تومەندەتە العاندارىن جاريالايدى. حالىققا ارنالعان پرەزەنتاتسيا دا بولادى دەپ ويلايمىن. ءبىزدىڭ ۇندەۋىمىزدەن كەيىن ولار بۇل ءونىمدى حالىق ءۇشىن بارىنشا قولجەتىمدى ەتەدى دەپ سەنەمىن», دەيدى دەپۋتات.