پەتروپاۆلدا ەرلى-زايىپتى 79 جاستاعى قالا تۇرعىنىنىڭ 13 ميلليون تەڭگەسىن قولدى ەتتى. ولار زەينەتكەرگە قىزىنىڭ جول-كولىك وقيعاسىنا كىنالى ەكەنىن, ءىستى جابۋ ءۇشىن قوماقتى قارجى قاجەت ەكەنىن ايتقان. ايتىلعان مالىمەتتىڭ راس-وتىرىگىن تەكسەرمەگەن پەتروپاۆلدىق قارجىنى كۋرەر-دروپپەرلەردىڭ قولىنا ۇستاتقان, دەپ جازادى Egemen.kz.
ءبىرشاما ۋاقىتتان كەيىن الدانعانىن تۇسىنگەن قارت قۇزىرلى ورگاندارعا ارىز تۇسىرگەن. جەدەل ىسكە كىرىسكەن پوليتسەيلەر بەينەباقىلاۋ كامەرالارى ارقىلى ەرلى-زايىپتىلاردىڭ جەكە باسىن انىقتادى.
وسىلايشا كۇدىكتىلەر 25 قاراشادا وقيعا بولعان ۋاقىتتان ءۇش كۇن وتكەن سوڭ ۇستالدى. تەرگەۋ بارىسىندا ولاردىڭ پەتروپاۆل قالاسىندا تۇراتىنى بەلگىلى بولدى. كۋرەر-دروپپەرلەردى كوكشەتاۋداعى نۇسقاۋشىلار جۇمساپ, الىنعان قارجىنى ءوز ەسەپ شوتتارىنا اۋدارتقان.
ءىىم ماماندارى ەرلى-زايىپتىلاردىڭ وسى سيپاتتاعى تاعى ءبىر ىسكە قاتىسى بارىن, ول وقيعا بويىنشا جابىرلەنۋشىلەردىڭ 1,5 ملن تەڭگە سوماسىنداعى قارجىسىنا زالال كەلتىرگەنىن انىقتادى.
قازىر الاياقتىققا بايلانىستى سوتقا دەيىنگى تەرگەپ-تەكسەرۋ ءىسى باستالعان.