نۇربانك مەملەكەتتىك قولداۋدىڭ ءبىر بولىگىن مەرزىمىنەن بۇرىن وتەۋ تۋرالى شەشىم قابىلدادى. جوسپار بويىنشا 27 قاراشادا قارجى ينستيتۋتى 4,5 ملن وبليگاتسيانى نومينالدىق قۇنى 1000 تەڭگەدەن كەرى ساتىپ الۋدى باستايدى. بۇدان كەيىن بانك بالانسىنداعى مەملەكەتتىك قولداۋ سوماسى 46,8 ملرد تەڭگەدەن 42,3 ملرد تەڭگەگە دەيىن ازايادى, دەپ حابارلايدى Egemen.kz.
بانك وكىلدەرىنىڭ ايتۋىنشا, مۇنداي شەشىم مەملەكەت باسشىسىنىڭ تاپسىرماسىنا سايكەس جانە بانك الەۋمەتتىك جاۋاپكەرشىلىك ساياساتى اياسىندا قابىلدانعان. مەرزىمىنەن بۇرىن وتەۋگە بانكتىڭ تۇراقتى قارجىلىق جاعدايى مەن ءتيىمدى جۇمىسى مۇمكىندىك بەرىپ وتىر. 1 قازانعا دەيىنگى جاعداي بويىنشا بانكتىڭ اكتيۆتەرى 3%-عا ءوسىپ, 550 ملرد تەڭگەگە جەتكەن.
نۇربانك ساپالى كرەديتتىك پورتفەل كورسەتىپ وتىر: NPL دەڭگەيى رۇقسات ەتىلگەن 10%-بەن سالىستىرعاندا 6,8%-عا دەيىن تومەندەدى. پروتسەنتتىك كىرىستەر 14%-عا ارتقان, سونىڭ ناتيجەسىندە تازا پايدا 12%-عا وسكەن. بانكتىڭ مەنشىكتى كاپيتالى 8%-عا كوبەيىپ, 76 ملرد تەڭگەنى قۇرادى.
بانك باسقارماسىنىڭ توراعاسى گۇلنار مۇساتاەۆانىڭ ايتۋىنشا, نۇربانك جاڭا دامۋ ستراتەگياسىن ىسكە اسىرىپ وتىر. ونىڭ باستى باعىتتارى – تسيفرلىق ترانسفورماتسيا, ترانزاكتسيالىق بيزنەستى كەڭەيتۋ, digital-شەشىمدەردى كۇشەيتۋ جانە شاعىن جانە ورتا بيزنەستى قولداۋ.
قارجى ۇيىمى مەملەكەتتىك قولداۋ رەتىندە بەرىلگەن قاراجاتتى مەرزىمىنەن بۇرىن قايتارۋ مىندەتتەمەسىنە ادال ەكەنىن اتاپ ءوتتى. دەگەنمەن, مۇنداي تولەمدەردىڭ كولەمى مەن مەرزىمى بانكتىڭ قارجىلىق ناتيجەلەرىنە بايلانىستى جۇزەگە اسىرىلادى. قازىرگى تاڭدا نۇربانك سەنىمدى ءوسىم كورسەتىپ, مەملەكەت الدىنداعى مىندەتتەمەلەرىن ۋاقىتىنان بۇرىن ورىنداۋعا مۇمكىندىك الىپ وتىر.
او «نۇربانك» 2020 جىلدىڭ 3 اقپانىندا بەرىلگەن قر قارجى نارىعىن رەتتەۋ جانە دامىتۋ اگەنتتىگىنىڭ №1.2.15/193 ليتسەنزياسىنا يە.