كاسپي قۇبىرجەلىسى كونسورتسيۋمى (كقك) جەلتوقسان ايىندا CPC Blend ماركالى مۇناي ەكسپورتىن تاۋلىگىنە 1,7 ملن باررەلگە دەيىن ۇلعايتۋدى جوسپارلاپ وتىر. قاراشا ايىنداعى جوسپار – تاۋلىگىنە 1,45 ملن باررەلدى قۇراعان, دەپ حابارلايدى Egemen.kz.
Reuters دەرەگىنشە, ەكسپورتتىڭ ءوسۋى ەكى نەگىزگى فاكتورعا بايلانىستى:
- تەڭىز كەن ورنىندا قازان-قاراشا ايلارىندا جۇرگىزىلگەن جوندەۋدەن كەيىن ءوندىرۋ كولەمىنىڭ ارتۋى;
- رەسەيلىك وندىرۋشىلەردىڭ قوسىمشا جەتكىزىلىمدەرى.
سونىمەن قاتار, ناقتىلانعان جونەلتۋ جوسپارى بۇدان دا جوعارى بولۋى مۇمكىن. سەبەبى كقك-نىڭ وڭتۇستىك وزەرەەۆكاداعى تەڭىز تەرمينالىنداعى توقتاتۋلار قاراشا ايىنداعى جوسپاردىڭ تولىق ورىندالۋىنا كەدەرگى كەلتىرگەن, ال بىرقاتار كولەمدەر جەلتوقسانعا اۋىستىرىلىپ جاتىر.
كاسپي قۇبىرجەلىسى كونسورتسيۋمى قازاقستان مۇنايىنىڭ 80%-دان استامىن ەكسپورتتاۋدى قامتاماسىز ەتەدى. قۇبىر جەلىسى تەڭىز جانە باسقا دا كەن ورىندارىن نوۆوروسسيسك ماڭىنداعى وڭتۇستىك وزەرەەۆكا تەڭىز تەرمينالىمەن بايلانىستىرادى.
اكتسيونەرلەر قۇرامى: رەسەي – 31%, قازاقستان – 20,75%, Chevron – 15%, قالعان ۇلەس – جەكە كومپانيالار.
دەرەكتەردە ايتىلعانداي, كقك ءباسپاسوز قىزمەتى جەدەل ەكسپورت كولەمدەرىنە تۇسىنىكتەمە بەرۋدەن باس تارتقان.