2025 جىلدىڭ قاڭتار–قازان ايلارىندا اقىلى جولداردان 72 ملرد تەڭگە (ققس-پەن) ءتۇستى. بۇل كورسەتكىش اقىلى جولدار جەلىسىنىڭ 4 883 شاقىرىم بولاتىن 26 ۋچاسكەگە دەيىن كەڭەيۋىمەن تىعىز بايلانىستى, دەپ حابارلايدى Egemen.kz.
قاراجاتتىڭ نەگىزگى بولىگى جولداردى جانە ينفراقۇرىلىمدى كۇتىپ-ۇستاۋعا, كاپيتالدىق شىعىندارعا, سونىڭ ىشىندە 89 تراكتور ساتىپ الۋ جانە تاعى 504 تەحنيكا بىرلىگىن جەتكىزۋگە جۇمسالعان.
10 ايدا 61,4 مىڭ م2 اۋداندا ويىقتار جوندەلىپ,19,6 مىڭ شاقىرىمعا جول تاڭباسى سالىنعان. 4 363 جول بەلگىسى ورناتىلىپ, 31,6 مىڭ بويلىق مەتر قورشاۋ جوندەلگەن جانە 417 مىڭ شاقىرىم جول قاردان تازارتىلعان.
«قازاۆتوجول» ۇلتتىق كومپانياسىنىڭ قىزمەتى باس پروكۋراتۋرا, ۇقك, جاپ, ىشكى مەملەكەتتىك اۋديت كوميتەتى جانە باسقا دا مەملەكەتتىك ورگاندار تاراپىنان تۇراقتى باقىلاۋدا. 2024 جىلى سىبايلاس جەمقورلىققا قارسى قىزمەت پەن ىشكى مەملەكەتتىك اۋديت كوميتەتى تاراپىنان تەكسەرۋلەر جۇرگىزىلگەن.
كومپانيانىڭ قارجىلىق ەسەپتىلىگى جىل سايىن تاۋەلسىز اۋديتتەن ءوتىپ, قارجى مينيسترلىگىنىڭ دەپوزيتاريىندە جانە رەسمي سايتتا اشىق جاريالانادى. بۇل قارجىنىڭ ماقساتتى ءارى ءتيىمدى جۇمسالۋىنا تولىق ايقىندىق بەرەدى.
اقىلى جولدار – ەلىمىزدىڭ جول سالاسىن جاڭعىرتۋعا مۇمكىندىك بەرەتىن زاماناۋي تەتىك. ولار جول ساپاسىنىڭ جوعارى ستاندارتىن ساقتاۋعا, قوزعالىس قاۋىپسىزدىگىن ارتتىرۋعا, لوگيستيكالىق بايلانىستاردى جىلدامداتۋعا, ينفراقۇرىلىمعا ينۆەستيتسيا تارتۋعا, رەسپۋبليكالىق بيۋدجەتكە تۇسەتىن جۇكتەمەنى ازايتۋعا ىقپال ەتەدى.
جولدىڭ ءاربىر شاقىرىمى, ءاربىر جاڭا تەحنيكا, ءاربىر ورناتىلعان بەلگى – اقىلى جۇيەنىڭ ناتيجەلى جۇمىسىنىڭ كورىنىسى. بۇگىن دە بۇل جۇيە ەلىمىزدىڭ جول جەلىسىن جاڭعىرتۋدىڭ ماڭىزدى قوزعاۋشى كۇشى بولىپ وتىر.